Konte: Rëndësi ka respekti brenda fushës...

Antonio Konte triumfoi sërish. Këtë herë jo 4-0 si në sezonin e parë, por Morata i mjaftoi për të marrë tri pikë dhe fituar një tjetër duel me rivalin e tij, Zhoze Murinjo, me të cilin mungoi edhe shtrëngimi i duarve. "Nuk është i rëndësishëm (shtrëngimi i duarve). Ajo që ka rëndësi është që fituam ndeshjen. Ti duhet të kesh respekt brenda fushe dhe jo jashtë fushe", tha italiani në lidhje me këtë temë. MORATA - "Alvaro tregoi personalitet të madh sepse duhet të kesh karakter që të luash në këtë kampionat. Jemi të zhgënjyer sepse mund të kishim shënuar më shumë, por edhe kaq mjafton. Ai është një lojtar i ri, por ka një vetëbesim të jashtëzakonshëm dhe kjo i bën mirë skuadrës".

FITORJA - "Është një fitore e rëndësishme. Kur luan kundër Junajtid është gjithnjë një ndeshje e madhe. Ne e njohim mjaft mirë këtë skuadër dhe ajo është shumë e fortë. Këto lloj fitoresh janë të rëndësishme për vetëbesimin. Treguam dëshirë të madhe dhe pasion për ta fituar këtë përballje. Ne mund të fitojmë ose humbasim, por shpirti duhet të jetë ky. Sezonin e shkuar e kishim këtë lloj shpirti në çdo ndeshje. Këtë sezon e nisëm me shumë probleme, me ulje ngritje, por kjo ndeshje tregoi se nëse duam, mund t'ia dalim".

DAVID LUIZ - Konte e dërgoi mbrojtësin brazilian në stol, duke e dënuar pas gabimeve ndaj Romës. Në lidhje me të ardhmen, ai e paralajmëroi: "Nuk e di nëse ka një të ardhme te Çelsi. Por, ai duhet të punojë fort, përndryshe e pret stoli dhe tribuna".