“Menaxhimi dhe konkurrenca televizive, faktorët e mungesës”

Flet ish-sekretari i FSHF, Eduard Prodani

Në lidhje me situatën e tifozëve në ndeshjet e kampionatit shqiptar të futbollit, gazeta ka kontaktuar me një nga ish-drejtuesit e Federatës Shqiptare të Futbollit si dhe me një nga ish-drejtuesit e Partizanit në të shkuarën. I kontaktuar nga "Panorama Sport" për arsyet që çojnë në boshatisjen masive të stadiumeve shqiptare në vitet e fundit, e vënë re edhe në nisjen e këtij edicioni, Prodani liston një sërë faktorësh. Në përgjigjen e tij, arsyeja kryesore është besueshmëria e ulët në garën sportive dhe në rezultatet e ndeshjeve si dhe te institucionet që kanë të bëjnë me sportin dhe garën sportive, konkretisht futbollin. Eduard Prodani përmend edhe faktin e ndeshjeve, që tashmë janë në një numër shumë të madh si mundësi për t'u ndjekur nga publiku, ndërkohë që ai përmend edhe faktin se konkurrenca për kampionatin shqiptar është shumë e madhe në lidhje me ndeshjet që transmetohen në televizion, nga kampionate të ndryshme. Ja edhe përgjigja e Eduard Prodanit sa i përket faktorëve që çojnë në uljen e ndjeshme të numrit të spektatorëve në shkallët e stadiumit:

- Besueshmëria e ulët në një garë sportive të drejtë, pa kompromise dhe të menaxhuar me paanësi.

- Cilësia e ulët e futbollit shqiptar.

- Besueshmëria e ulët në institucionet që organizojnë dhe japin drejtësi në futboll.

- Konkurrenca edhe e futbollit botëror që transmetohet praktikisht i plotë në televizion.

- Transmetimi i ndeshjeve në televizione.

- Intensiteti i lartë i ofertës për të ndjekur futboll.

- Pjesëmarrja masive në bastet sportive e popullsisë së interesuar në futboll (ndjekin paralelisht ndeshjet në pikat e basteve ku në të njëjtën kohë ke mundësi të ndjekësh disa kampionate paralelisht me ndeshjet e futbollit shqiptar).

- Venitja e traditës dhe mungesa në veprimtaritë kryesore e disa klubeve tradicionale nga qendrat kryesore urbane.

- Cilësia e stadiumeve dhe fushave të lojës.

- Gjendja ekonomike e popullsisë.

- Oraret e papërshtatshme të ndeshjeve.

- Mungesa e strategjive dhe politikave të rritjes së interesit për ndeshjet.

- Mungesa e bashkëpunimit, komunikimit dhe mbështetjes së grupeve të organizuara të mbështetësve (tifozëve).

- Dobësia institucionaloorganizative e klubeve, paqëndrueshmëria, mungesa e profesionalizmit dhe seriozitetit në punën me skuadrat.

Identiteti dhe imazhi publik jo i përshtatshëm në ndonjë rast i drejtuesve të klubeve.