Stadiumet e zbrazura, kampionati në krizë besimi
Nga akuzat për trukime, deri te sjellja mediokre e policisë
Krizë besimi, nivel i ulët, tribunat jo ko mode, klube pa histori dhe deri te sjellja absurde e forcave të rendit. Këto, por jo vetëm, janë disa nga arsyet që "Panorama Sport" mundohet të sjellë për lexuesin sa i përket boshatisjes së stadiumeve në Kategorinë Superiore gjatë këtij sezoni. Në fazën e parë të kampionatit, përjashto tri ndeshje Partizani- Kukësi, Skënderbeu-Partizani dhe VllazniaTeuta, në të gjitha të tjerat, pjesëmarrja e tifozëve në stadium ka qenë e ulët.
* Një element i rëndësishëm që vret gjithnjë e më tepër futbollin tonë është mungesa totale e besimit nga ana e tifozëve për integritetin e klubeve të Kategorisë Superiore. Një pjesë e vogël e ndeshjeve që janë manipuluar, ka nxirrë gjithë imazhin e kampionatit, sepse nuk ka pasur kurrë ndëshkime serioze për të rivendosur besimin te gara e drejtë.
* Vërtet kemi bërë hapa përpara sa i përket infrastrukturës në Superiore, me stadiume që përmbushin edhe kriteret e UEFA-s, por ama në tribuna nuk ka ndonjë komoditet për tifozët. Sektorë të amortizuar, që nuk të ofrojnë asgjë komode ekstra, teksa ndjek një ndeshje.
* Është shumë e vështirë për të shkuar familjarisht në një ndeshje të kampionatit shqiptar. Thuajse në të gjitha stadiumet ofendimet në kor janë të pranishme, por në vendin tonë i tejkalojnë të gjitha limitet. Afrimi i femrave në stadiume duket si një mision i pamundur, edhe pse në qytete si Tiranë, Korçë, Shkodër e Gjirokastër ka prani modeste.
* Klubet shqiptare nuk kanë asnjë projekt për të afruar tifozët në stadium. Edhe ato elitare lënë për të dëshiruar në menaxhimin që i bëjnë çështjes së tifozëve, duke ia lënë gjithçka rastësisë.
* Të gjitha ndeshjet e Kategorisë Superiore transmetohen "live" nga platforma "Supersport", por edhe TVSH. Shumë prej tifozëve ndihen më komod për të ndjekur takimet nga TV, se sa të shkojnë në stadium.
* Lëvizja demografike në qytete ka ndikuar jo pak në këto vitet e fundit. Gjithnjë e më tepër përqendrimi është në kryeqytet.
* Mungojnë në Superiore klube elitare, që i kanë dhënë tonin futbollit shqiptar ndër vite, duke nisur nga Tirana, Dinamo, Elbasani, Apolonia, Tomori, Besëlidhja etj. Superiorja ka humbur një derbi TiranaPartizani, por edhe një klasike të futbollit shqiptar, Vllaznia-Tirana.
* Edhe pse futbolli i sotëm njeh gjithçka dhe, me gjithë respektin për klubet, sërish është e vështirë për t'u perceptuar nga pjesa e shëndoshë e tifozëve fakti që skuadra si Kukësi, Kamza apo Laçi janë tashmë rivalë të denjë të ekipeve legjendë të futbollit shqiptar.
* Shkëputja e klubeve nga qytetet është një arsye madhore.
Çfarë kuptimi ka që Kukësi stërvitet gjatë gjithë kohës në Tiranë dhe shkon në qytetin e vet vetëm për ndeshje?! Ç'kuptim ka që edhe Laçi më shumë bën stërvitje në Kamzë, se sa në shtëpinë e vet?!
* Kanë munguar totalisht politikat e FSHF-së në gjithë këto vite, për t'ua bërë më të lehtë tifozëve dhe t'u ofrojë atyre një standard. Më shumë institucioni ka kontribuar në mbylljen e stadiumeve, me vendime që dënojnë një qytet të tërë dhe jo individë që mund të kenë gabuar.
* Shpesh çmimet e biletave janë të papërballueshme, veçanërisht nga tifozë të qyteteve të ndryshme, ku varfëria është ulur këmbëkryq.
* Në fund, por jo për nga rëndësia, është mediokriteti i forcave të rendit, me një sjellje agresive në stadiume. Policia bëhet protagoniste për keq thuajse çdo fundjavë në stadiumet shqiptare.