FSHF: Mos e quani boshatisje, rënie ka pësuar vetëm Partizani
Flet drejtori administrativ, Bastari: Më shumë kanë ndikuar rezultatet
Drejtori administrativ i FSHF- së, Denis Bastari, i cili prej vitesh ka mbajtur detyra të rëndësishme në institucionin e futbollit, mendon se situata në stadiumet shqiptare nuk është aq e rëndë sa mund të mendohet apo aludohet. Në bisedën për "Panorama Sport", Bastari mundohet të japë shifra konkrete të sezoneve të fundit, ndërsa bën edhe një krahasim me kampionatet e vendeve të tjera në rajon.
TIFOZËT
"Mendoj se termi boshatisje masive është i gabuar, kjo bazuar në shifrat e dy viteve të fundit. Në rast se do t'u referohemi statistikave të marra nga sistemi ' COMET', mund të vërejmë lehtësisht një rritje me pothuajse 20% në pjesëmarrje të përgjithshme (e përkthyer në shifra rreth 96.392 tifozë më shumë në stadium) në numër tifozësh ndërmjet sezonit ' 15/' 16 dhe ' 16/ ' 17. Një shifër e konsiderueshme referuar dhe rajonit apo kampionateve të rajonit. Gjithashtu referuar edhe ekipeve në veçanti, me përjashtim të Partizanit, që ka pësuar një rënie në pjesëmarrjen e tifozëve në stadium, pjesa tjetër e klubeve ka pësuar një rritje të vazhdueshme, ku bien në sy Vllaznia, Kukësi dhe Flamurtari, me një rritje rreth 30- 40% në numrin e tifozëve. Sigurisht kjo s'do të thotë që kjo është më e mira e mundshme. Një pjesë e mirë e kësaj pune u takon klubeve në veçanti, por FSHF është munduar gjithmonë që të rrisë masivitetin e personave që të shkojnë në stadium", ka thënë fillimisht Bastari për situatën në stadiume.
DËNIMET
Por sa kanë ndikuar në boshatisjen e stadiumeve shqiptare vendimet shpesh absurde të Komisionit të Disiplinës në FSHF? Drejtori Bastari jep këtë argument: "Në shumicën e rasteve, dënimet e marra nga Komisionet e Disiplinës ndaj klubeve janë kritikuar si nga publiku apo specialistët, por nuk është vlerësuar në shumicën e rasteve. Pra, të gjitha klubet dhe tifozëritë janë të njoftuara për sanksionet që mund të marrin në raste incidentesh dhe prej tyre kërkohet vetëm respektimi i rregullave për të cilët ata kanë rënë dakord. Ato nuk marrin parasysh faktin që kjo mund t'i ndihmojë për ta zgjeruar rrethin e tifozëve që të kenë në stadium, ku mund të shkojnë më shumë gra apo fëmijë, në rast se ofendimet do të ishin me të pakta në shkallët e stadiumeve, apo kushtet e ofruara do të ishim më të qytetëruara". INFRASTRUKTURA Bastari mendon se përmirësimi i kushteve në stadiume do të rrisë praninë e tifozëve. "Në të njëjtën kohë, rritja e numrit të tifozëve, përkon dhe me infrastrukturën e përmirësuar në pjesën më të madhe të stadiumeve në vend. Tashmë pothuajse në çdo qytet të Shqipërisë ka një stadium, ku mund të luhen kompeticione zyrtare europiane për moshat. Rastet dhe arsyet për ulje të numrit të tifozëve në stadium janë nga më të ndryshmet dhe sigurisht më i ndjeshmi janë dhe rezultatet sportive. Në rastet kur një ekip është pretendent për vendet e larta në klasifikim, interesi i tifozëve detyrimisht është më i lartë. Raste të tilla ka plot dhe në futbollin europian. Milani e filloi sezonin me më shumë se 60.000 tifozë në një ndeshje të turit paraeliminator dhe, pas disa rezultateve negative, entuziazmi tashmë ka rënë dhe shifrat janë përgjysmuar. Personalisht mendoj që kushtet në stadiumet shqiptare gjatë viteve të fundit janë përmirësuar së tepërmi, jo vetëm në aspektin e infrastrukturës, por dhe të rendit, por kërkohet gjithashtu një punë më e mirë nga klubet për thithjen e tifozëve, strategji të mirëfillta marketing për të bërë dhe familjet apo fëmijët që ta shikojnë si një ambient argëtimi", përfundoi drejtori administrativ i institucionit të futbollit shqiptar. Olsi Tujani