Mbledhje te Kukësi, Gjici i jep besimin trajnerit
Kritika për Allën, gaboi te pësimi i golit të barazimit
Barazimi ndaj Fla murtarit nuk ka kënaqur shumë presidentin e Kukësit, Safet Gjici, i cili ka mbetur i zhgënjyer si nga rezultati ashtu edhe nga loja e ekipit të tij. Për këtë arsye Gjici ka thërritur në një mbledhje urgjente të gjithë stafin e skuadrës. Dhe kur të gjithë prisnin presidentin me nerva dhe që kritikonte e ngrinte zërin, ngelën të shtangur me sjelljen e tij. Gjici nuk ka kritikuar askënd, përkundrazi takimi është zhvilluar me tone të ulëta dhe mjaft konstruktiv. Gjatë tij, Gjici mori disa vendime. Së pari, presidenti ka konfirmuar trajnerin Milinkoviç dhe stafin e tij, duke u shprehur hapur atyre mbështetjen dhe besimin e tij. Madje, presidenti ka shkuar edhe më tej, duke thënë se nuk është faji i trajnerit që disa lojtarë shfaqen dobët dhe bëjnë gafa në mbrojtje apo dhe në sektorë të tjerë. Milinkoviç dhe stafi i tij do të kenë afat deri në janar, ku të tregojnë potencialin e tyre, paçka problematikave të hasura deri tani. Nuk do të ketë penalizime për asnjë lojtar, të paktën përkohësisht gjithashtu s'do të ketë më objektiva afatgjatë sa u përket ndeshjeve, por synimi do të jetë fitorja në ndeshjen e radhës në kampionat ndaj Kamzës. Çdo lojtar që nuk do të bëjë paraqitje të mirë, pritet të ulet në
stol nga ana e trajnerit.
ANALIZA - Takimi me Flamurtarin u shoqërua me disa episode, si gabimet e mbrojtjes që Kukësi pësoi golin e barazimit, por dhe për faj të arbitrit Hamiti, i cili, sipas verilindorëve, nuk akordoi penallti kur Ethemi në minutën e 60-të u rrëzua në zonë. Këtu kryesori e ka ndëshkuar me karton të verdhë për simulim dhe për drejtuesit e Kukësit ky ishte një episod kundër tyre, që ndikoi për rezultatin përfundimtar. Gjithashtu në klub janë duke punuar për të bërë ankesën në
FSHF, për këtë rast, i cili, sipas moviolistëve të ndryshëm, është konsideruar si penallti.
KRITIKAT - I vetmi lojtar, i cili ka marrë kritika gjatë mbledhjes së djeshme, ka qenë Albi Alla. Sipas stafit dhe presidentit, ai ka gabuar në momentin që skuadra ka pësuar golin e barazimit. Kështu që, veç gjyqtarit, humbja i faturohet edhe atij. Gjatë bisedës mes drejtuesve është kërkuar që mbrojtja të jetë më e kujdesshme, pasi në nëntë javë ekipi ka pësuar shtatë gola.