Flamurtari, 100 mijë euro për Zisin

Diskutohet edhe opsioni i huazimit, por vlonjatët duan pronësinë e kartonit

Flamurtari, në sulm për talentin e Bylisit, Niko Zisi. Drejtuesit e klubit dhe trajneri Shpëtim Duro kanë nisur që të mendojnë që tani për përforcimet në merkaton dimërore. Vlonjatët e kërkojnë me patjetër lojtarin që të bëhet pjesë e merkatos së janarit dhe t'i bashkohet Flamurtarit. Sulmuesi 22-vjeçar është një kërkesë e trajnerit Shpëtim Duro, i cili dëshiron që ta ketë në ekip sulmuesin. Lajmi konfirmohet ekskluzivisht për "Panorama Sport" nga burime zyrtare pranë Klubit të Futbollit Flamurtari. Zisi ka lindur në Fier dhe është 22 vjeç, 1.78 i gjatë dhe po shkëlqen me ballshiotët. Sulmuesi ka bërë një paraqitje shumë të mirë me ekipin e Bylisit dhe së fundmi ai i ka shënuar edhe Tiranës, ku duhet thënë se ka spikatur me veprimet në krah dhe vështirësinë që krijoi në mbrojtjen bardheblu. Vlonjatët e duan në ekip futbollistin, por e vetmja gjë që mund të pengojë transferimin e tij në janar te Flamurtari është kontrata. Mësohet se Zisi ka një kontratë katërvjeçare me klubin ballshiot. Lojtari mund të vijë në Vlorë edhe në formën e huazimit, por një opsion i tillë nuk është shumë i pëlqyer nga drejtuesit e klubit.

FINANCAT - Por, duket se në Vlorë nuk janë të gatshëm që të marrin në huazim lojtarin dhe drejtuesit e Flamurtarit janë të gatshëm për të bërë edhe sakrifica ekonomike. Kjo, pasi Zisi premton për të ardhmen dhe për trajnerin Duro marrëveshja duhet kryer sa më shpejt. Ndërsa klubi ballshiot edhe mund të përfitojë financiarisht nga shitja e kartonit të lojtarit, vlera e të cilit mund të shkojë edhe 100 mijë euro. Mbetet për t'u parë se çfarë do të ndodhë deri në janar, por trajneri Duro këmbëngul që të ketë në ekip shërbimet e 22- vjeçarit. Tekniku kryeqytetas u beson lojtarëve të rinj në moshë, duke u dhënë hapësira aktivizimi. Ai ka kryer merkato edhe gjatë verës te skuadra e Kategorisë së Parë, duke marrë nga Besëlidhja Sidiben dhe Kamaranë, të dy lojtarë nga Guinea në moshë të re.