Sherret te Çelsi, Abramoviç zbret në fushë

Rusi i jep besim teknikut, por kërkon të investigojë vetë

Pronari i Çelsit, Ro man Abramoviç, pritet të ndërhyjë në shumë në punët e klubit pas dorëheqjes së drejtorit teknik, Majkëll Emenalo. Manjati rus ishte në qendrën stërvitore gjatë javës së fundit dhe "Mirror" zbulon se kampionët mund të mos e zëvendësojnë më direkt ish-drejtorin e tyre teknik, duke i dhënë më shumë kontroll drejtoreshës së bordit, Marina Granovskaia. Marina është njeriu më i besuar i bosit të klubit dhe ushtron pushtetin e saj edhe në lidhje me transferimet dhe negociatat.

BESIM KONTES "Mirror" zbulon gjithashtu se Abramoviç dhe hierarkia e klubit i kanë dhënë trajnerit Konte mbështetjen e plotë në vendimin e tij për të lënë jashtë ndeshjes me Mançester Junajtid "rebelin" David Luiz. Pavarësisht këmbënguljes së Kontes se vendimi ishte taktik, mediat kanë zbuluar se lënia e Luizit jashtë ndeshjes së fundit, erdhi pas një përplasjeje verbale mes brazilianit dhe teknikut për taktikat në ndeshjen e Champions-it kundër Romës. Kjo ishte një mbështetje e hapur e trajnerit, por Abramoviç nuk dëshiron më përplasje në dhomat e zhveshjes edhe pas rastit Diego Kosta, konflikt që mori fund me largimin e sulmuesit nga Londra. Për këtë arsye dyshohet që ai ka zbritur deri në dhomat e zhveshjes për të kuptuar se deri në çfarë pike

janë të tensionuara marrëdhëniet mes lojtarëve dhe teknikut. E ardhmja afatgjatë e Antonio Kontes në stol mbetet e pasigurt, por në këto momente Çelsi e shikon shumë të rëndësishme ruajtjen e harmonisë brenda skuadrës për të pasur një tranzicion sa më

natyral pas largimit të njeriut që shërbeu për 10 vite në klub dhe rikthyer skuadrën në luftën për titull. Abramoviç e di shumë mirë se çfarë sjellin problemet brenda dhomave të zhveshjes. Zhoze Murinjo u shkarkua në vitin 2015 për shkak të një zënke të tij me lojtarët. Dhe një gjë të tillë e konfirmoi publikisht edhe Emenalo dy vite më parë. Prandaj bosi rus kërkon që të zbulojë personalisht nëse ka një problem të ngjashëm edhe me Konten, veçanërisht pas përplasjeve me dy emra të rëndësishëm si Kosta dhe Luiz.