Kukësi nis merkaton, rikthen Albi Dostin
Ja marrëveshja mes palëve, lojtari: Jam shumë i lumtur
Kukësi nis merkaton e janarit që në nën tor. Mesfushori i përjashtuar nga Teuta pak ditë më parë, Albi Dosti, afrohet te kampionët e Shqipërisë. Pas aventurës jo të mirë që durrsaku ka pasur në sezonin 2014- 2015 me Kukësin, në të cilën në atë kohë nuk gjeti shumë hapësira, tashmë rikthehet ta provojë sërish me verilindorët. 26- vjeçari kërkon një aventurë të re dhe të suksesshme tanimë me skuadrën kampione. Gazeta zbulon se ka qenë vetë lojtari, i cili kishte marrë letrat nga Teuta dhe zyrtarisht ishte pa ekip, që të rikthehej te Kukësi sërish nëse presidenti Gjici do ta pranonte. Duke marrë kërkesën e lojtarit, kreu i klubit ka folur me stafin, të cilët kanë dhënë mendim pozitiv për futbollistin dhe atëherë presidenti e priti dhe e takoi lojtarin, ku palët arritën marrëveshjen. AKORDI
Palët kanë rënë dakord që futbollisti të stërvitet me ekipin dhe do të ketë të gjitha privilegjet që ka çdo futbollist tjetër i Kukësit, por deri në janar është pa rrogë. Dosti
nuk do paguhet derisa të rifillojë kampionati në janar. Kjo ishte një lëvizje e papritur e të dyja palëve, pasi Albi Dosti ka qenë pjesë e Teutës deri pak ditë më parë, derisa ndodhi përjashtimi i tij mbas ndeshjes Lushnja- Teuta. Dosti iu bashkua që dje
Kukësit edhe në stërvitje. DOSTI
Vetë futbollisti durrsak në një prononcim për "Panorama Sport" shprehet: "Jam i kënaqur që i jam bashkuar Kukësit, ekipi kampion i Shqipërisë. Falënderoj presidentin Gjici që më hapi derën.
Unë kam qenë pjesë e Kukësit dhe në sezonin 2014- 2015 dhe ishte një fatkeqësi që atëherë nuk arritëm dot të shpalleshim kampion, pasi kishim një skuadër mjaft të mirë. Por, unë dhe atëherë kur u largova nga Kukësi, u largova me shtrëngim duarsh me respekt me të gjithë drejtuesit, kështu që nuk kishte sesi të mos e mendoja një rikthim te Kukësi. Firma është çështje kohe. Sa për objektivat, dihet që Kukësi ka pretendime të mëdha se është ekipi kampion në fuqi dhe unë gjithashtu do kërkoj që të ndihmoj sa më shumë", tha Dosti.