Bylisi “makth” i kryeqytetasve, ja si e përgjumi Tiranën
Ballshiotët erdhën me strategji, si ndaj Partizanit
Të pësosh një humb je, nuk është ndonjë dramë e madhe. Megjithatë, te Tirana rezultoi pikërisht kështu. Bardheblutë janë "tronditur" shumë nga rezultati i javës së 7-të, pasi mendojnë që përballë ekipit që renditet në vendin e dytë nuk lanë vetëm 3 pikë, por 6. A ishte vetëm një ditë e keqe, apo kaq ishte forca e këtij grupi, këtë do ta dëshmojë më së miri vazhdimësia. Por, deri më tani, mund të thuhet pa frikë se "mendjemadhësia" e ndëshkoi skuadrën e Ze Marias. Dhe meritë për këtë kanë ballshiotët. Këta të fundit kanë ndjekur një strategji efikase për të "përgjumur" kryesuesit. Vinin pas një barazimi me Pogradecin dhe, sikur të mos mjaftonte kjo, ballshiotët kanë përhapur lajmin se kishin frikë nga ndonjë humbje me goleadë në "Selman Stërmasi". Madje, në një bisedë të zhvilluar mes drejtuesve të të dyja klubit, prej miqve është thënë: "Të paktën të mos pësojmë 3 ose 4". Dhe këto fjalë kanë shkuar në 'veshin' e futbollistëve, që ranë lehtësisht "pre", paçka se Ze Maria ishte munduar t'i mobilizonte. Ata e patën menduar 90- minutëshin ndaj mallkastriotëve po aq të kalueshëm si 6 kundërshtarët e mëparshëm. Por, e kundërta ngjau. Bylisi zbriti në fushë me një plan të mirorganizuar. Jo vetëm që u mbrojt me forca të shumta dhe i fitoi mesfushën, por me golin e Niko Zisit arriti t'i shënonte golin e parë pas 598 minutash Tiranës. PRECEDENTI "PARTIZANI"
Bylisi mund të quhet pa frikë si "makthi" i kryeqytetasve. Kujtojmë që dy vite më parë, me një strategji të ngjashme, "përgjumi" edhe Partizanin, duke u hequr titullin nga duart 3 javë para fundit. Ndërsa të kuqtë bëheshin gati për këtë duel, ballshiotët ishin në amulli të plotë. Një ditë para asaj ndeshjeje, madje qarkulloi lajmi se klubi mund të braktiste
kampionatin. "Tërbimi" i zyrtarëve asokohe vinte nga gjykimet, por edhe prej zbehjes së shpresave për të mbijetuar, edhe pse matematikisht ishin në garë. U hodhën disa skenarë, që nga protesta për ta nisur ndeshjen pak minuta me vonesë dhe deri te dalja në fushë me skuadrën rezervë. Dilemat u shtuan edhe tek ardhmja me vonesë e Bylisit
në kryeqytet më 8 maj 2016. Motivi: autobusi "ngeci" në trafik, pas një aksidenti të ndodhur në autostradën Durrës-Tiranë. Dhe, për pasojë, ajo përballje nisi 6 minuta me vonesë. Edhe pse të kuqtë mendonin që ishte vetëm një takim për të luajtur, në fushë e pësuan. Humbën me shifrat 1-2, ndërsa i "gjunjëzoi" dygolëshi i Ardit Hoxhajt.