Trajner 26 vjeç, Marvi Kristo ulet në "katedër"
Marvi Kristo e ka nisur sportin si basketbollist profesionist, që në moshën 19 vjeç te Studenti me profesor Bujar Shehun, për gati tri vite radhazi. Më herët Marvi, që fëmijë e ka pasur pasion lojën e basketbollit dhe nga fakti që babai i tij ishte një profesor i kësaj loje e një udhërrëfyes në jetë për ta nxitur të birin në karrierë e tij. Që 8 vjeç, ai aktivizohet me grupmoshat zinxhir të fëmijëve në Sportklub Tirana, ndërkohë që babai, Maksim Kristo bëhet një mësues për të. Më pas, si basketbollist te mosha U- 16 dhe U- 18. Në sezonin 2013-' 14, ai ka kaluar te Partizani, ku trajner kishte Arben Fagun, duke vijuar si basketbollist, deri në sezonin 2016' 17, kur e ngjitën skuadrën e Partizanit në Kategorinë e Superligës. Tashmë ai është bërë zëvendëstrajneri i kësaj skuadre duke bashkëpunuar ngushtë me profesorin dhe trajnerin e mirënjohur Arben Fagu. Por, krahas punës si zëvendëstrajner pranë ekipit të kuqve, së bashku me babanë e tij kanë ndërtuar dhe një akademi basketbolli të grupmoshave për fëmijë dhe U- 16, U- 18, e cila ka marrë emrin "Real", me një përvojë 5- vjeçare. Gjatë këtyre viteve të fundit është pjesëmarrëse në kampionatet e paratërinjve dhe të të rinjve.
DEDIKIMI PËR TË ATIN
"Kam dëshirë të gjurmoj babanë e të kesh baba një profesor basketbolli në shtëpi, sigurisht se të krijohet dhe një hapësirë tjetër që rrallëkush mund ta ketë një fat të tillë. Në shtëpinë tonë basketbolli ka një rëndësi shumë të madhe dhe merr vlera të jashtëzakonshme. Shumë herë ne shikojmë ndeshje basketbolli bashkë dhe diskutojmë rreth tyre, por kemi dhe ekipet që ne i stërvitim së bashku. Shija dhe stili im në stërvitjen lojtarëve të rinj dhe të së ardhmes për basketbollin shqiptar është krejtësisht ndryshe, unë kam një vizion tjetër për basketbollin dhe kjo është ndoshta një stimulim pozitiv gjatë debateve tona të shpeshta se si ta bëjmë më mirë. Babai gjithnjë ka qenë i drejtë dhe i sinqertë dhe njeri që nuk di të jetë i konjukturave, ka qenë një virtyt që rrallëkush e ka në basketboll e unë dua t'i ngjaj gjithnjë atij. Të paktën të kem njohuritë në masën 90%, ndoshta nuk e kopjoj dot ashtu siç është babanë tim. Ai ka qenë prezent në çdo hap që unë hidhja në jetë. Që kur unë kam filluar të luaj basketboll me moshat, ai përherë ka qenë prezent, ku shpeshherë kërkonte që unë të jepja maksimumin duke kërkuar mundësitë më të mira të mia, ku kontrollonte edhe gabimet e mia e mundohej që unë t'i korrigjoja. Nëse kam arritur të luaj në atë nivel që unë kam bërë këtë karrierë, gjithçka dhe çdo meritë ka ardhur falë punës së tij. Ai shpeshherë më brumoste që vullneti nuk duhet kurrë të shterojë", shprehet ai për lidhjet e ngushta me babanë dhe ndihmesën që ai ka kontribuar për aftësimin e tij. FALËNDERIM PËR ARBEN FAGUN
"Falënderoj profesor Arben Fagun, i cili bëri të mundur që unë të punoj krahas tij, duke parë që është një nga trajnerët më të mirë në basketbollin shqiptar. E shoh këtë fakt më tepër si mësim dhe si një motivim, por edhe si profesor për të pasur një karrierë të shkëlqyer për të ecur përpara. Thjesht të qenurit pranë tij, të bën të mendosh e të studiosh nga ai sa i përket rolit të trajningut në basketboll". Abdulla Dushku