Theu vertebrat në tapet, Leonardo Frrokaj jashtë rrezikut për jetën
Shmanget tragjedia për shqiptarin në Ballkaniadën U-17
Një ngjarje e rëndë ka ndodhur në Kampionatin Ballkanik të të rinjve U-17 në mundje, e cila po zhvillohet në Slloveni, ku Shqipëria merrte pjesë me pesë mundës. Sportisti shqiptar, Leonardo Frrokaj, humbi ndjenjat gjatë garës me një kundërshtar moldav, pasi dëmtoi dy vertebrat e shtyllës kurrizore. Menjëherë Federata Botërore e Mundjes dhe organizatorët i erdhën në ndihmë atij duke e transportuar me helikopter në drejtim të Lubjanës, ku i është nënshtruar një operacioni për rreth 4 orë, ne një prej spitaleve të specializuar për të tilla ndërhyrje, raporton "Top Channel". Fillimisht, situata shëndetësore ka qenë tepër e rëndë me 17-vjeçarin që qëndroi në gjendje kome deri në ndërhyrjen tjetër, me të cilën mjekët i rikthyen frymëmarrjen natyrale. Mundësi shqiptar pësoi një dëmtim në garën e tretë, ku konkurronte për medaljen e artë ose atë të argjendtë, por gjërat kanë shkuar keq, pasi talenti ka bërë një lëvizje fatkeqe, e cila solli dëmtim në vertebrat e shtyllës kurrizore, duke mbetur pa ndjenja në tapet. Lidhur me ngjarjen foli Presidenti i Federatës Shqiptare të Mundjes, Martin Biba, por edhe Ministria e Arsimit dhe Sportit, Lindita Nikolla, të cilët kanë marrë masat për ndjekjen e rastit dhe çdolloj ndihme tjetër për sportistin tonë. "Leonardo është në gjendje të rëndë, por fatmirësisht jashtë rrezikut për jetën, siç na kanë siguruar mjekët pas operacionit. Ai është një kampion i këtij sporti dhe na takon të gjithëve që t'i qëndrojmë pranë atij dhe familjes së tij", ka nënvizuar Biba. Në këtë turne ka qenë prezent edhe babai i talentit të mundjes dhe familjarë të ti, të cilët vazhdojnë t'i qëndrojnë pranë Leonardos. Ky i fundit u shpall pak javë më parë kampion i Shqipërisë në stilin greko-romak për peshën 63 kilogramë dhe deri dje po ofronte një paraqitje fantastike, përpara aksidentit të rëndë që i ndodhi në tapet.