Beqaj pa doreza: Shqipëria do të përsërisë suksesin
“Zgjedhje të mençura nga Panuçi, ja kë veçoj nga Superiorja”
Prej shumë vitesh, i është dashur t'i ndjekë ndeshjet e Kombëtares sepse përpara tij ishte një gardian si Foto Strakosha. Arjan Beqaj, në një intervistë për "Panorama Sport", kujton miqësoren e fituar 1- 4 në Turqi, por edhe analizon situatën në kampin kuqezi ku janë në përbërje dy portierë në formë shumë të mirë. Sipas Beqajt, për Shqipërinë është një fat i madh. "Do të ishte fat i keq nëse do të ishin dy portierë të këqij (qesh…). Është fat i mirë. Shumë i mirë që të kesh dy portierë të tillë", shprehet ndër të tjera ish- gardiani i Kombëtares, i cili i cilëson zgjedhje të mençura ato që Panuçi ka bërë përpara kësaj miqësoreje.
Ku është Beqaj momentalisht, cili është angazhimi juaj personal?
Siç e dini, jam trajneri i ekipit kombëtar të Qipros. Momentalisht jemi në Gjeorgji dhe kemi ndeshje miqësore me këtë kombëtare.
Shqipëria do të luajë me Turqinë, por a e kujtoni miqësoren e vitit 1998 në fitoren 1- 4?
Me sa mbaj mend, ka qenë një miqësore ku unë jam futur si zëvendësues dhe Foti ( Foto Strakosha) ka luajtur në pjesën e parë. Një ndeshje që e kemi luajtur jashtë Stambollit, nëse kujtohem mirë, ka qenë në Djarbakir.
Si i kujtoni emocionet e asaj përballjeje?
Çdo ndeshje me Kombëtaren, për ne ishte një kënaqësi e madhe dhe emocionuese. Ndeshje me një emocion të veçantë, të cilat të ndihmojnë në ecurinë e karrierës, por mbi të gjitha, të japin edhe një përmbushje në aspektin emocional dhe moral. Çdo fitore na gëzonte, aq më tepër kur përballë ishte një ekip si Turqia.
Së fundmi, sa e keni ndjekur Shqipërinë dhe si i keni parë ndryshimet me Panuçin?
Për mua, Panuçi ka filluar të bëjë një punë të mençur.
Në ç'kuptim, kujt i referoheni?
Në kuptimin që ai po ruan një bosht lojtarësh, që sollën suksesin në Europian dhe në të njëjtën kohë, po kërkon ta freskojë
skuadrën me lojtarë të rinj që kanë edhe kualitetin, por edhe dëshirën për të dhënë kontributin e tyre në suksese të tjera të Kombëtares. Sigurisht, të gjithë jemi të vetëdijshëm, që për Shqipërinë nuk ka qenë e lehtë, pas Europianit, që të menaxhonte një sukses kaq të madh. Nuk është e lehtë për ekipet e vogla diçka e tillë.
Po nis një edicion i ri… Po, dhe tani po shoh që sërish është rikthyer fryma e grupit dhe sigurisht, që mundësitë janë që Shqipëria të arrijë të ketë sërish
sukses. Zgjedhjet e trajnerit janë të drejta, sipas meje.
Edhe duke lënë jashtë kapitenin, si dhe të afrojë një futbollist pa skuadër?
Nuk duhet t'i shohim gjërat në këtë perspektivë, e cila, sipas meje, është thjesht e rastit. Dua të them që Naser Aliji, me çfarë kam parë prej tij, ka potencial. Nuk e di si i ka pasur situatat e tij dhe gjërat kanë shkuar deri në pikën që të jetë pa ekip. Sa i përket Agollit, nuk është nevoja që të futem në komente. Ansi ka bërë një karrierë të shkëlqyer.
Me çfarë kam lexuar, kjo zgjedhje është bërë në dijeni të Ansit, i cili ka biseduar me trajnerin dhe i ka kërkuar që të shohë edhe lojtarë të tjerë, duke qenë se i di edhe aftësitë, edhe mundësitë e Agollit për të dhënë në një ndeshje. Kjo është edhe arsyeja pse bëhen ndeshjet miqësore, për të parë gjëra që nuk ke mundësi t'i shohësh në ndeshjet zyrtare.
Si e keni parë ecurinë e dy portierëve të Kombëtares, Berishës dhe Strakoshës?
Në radhë të parë, Shqipëria
është me fat që ka dy portierë të shkëlqyer. Me Etritin, kisha rast të takohesha javën që shkoi, duke qenë se Atalanta luajti në Nikosia me Apollonin. Të dy portierët kanë treguar nivel shumë të lartë që nga vjet. Kanë vazhdimësi të dy, të cilët luajnë në nivel shumë të lartë.
Si ishte takimi mes jush?
Po ju them që ishte një takim special edhe për djalin tim, të cilit iu bë qejfi shumë që e pa Berishën nga afër apo edhe që mori prej tij një fanellë si dhuratë.
A mendoni se Strakosha mund të "vuajë" atë që e keni përjetuar ju me Foto Strakoshën?
Jo, jo ( qesh…). Nuk duhet që t'i shohim gjërat kështu. Në një ekip, secili ka kontributin e vet. Ajo që ka rëndësi, është që do të vijë edhe momenti i Strakoshës në një kohë të caktuar. Ai është një djalë i ri, i cili po bën shumë, shumë mirë, si asnjë portier tjetër shqiptar. Ka arritur gjëra që asnjë portier tjetër shqiptar nuk ia ka dalë në një moshë të tillë.
Mos më keqkuptoni, pyetja konsiston në idenë që, duke qenë të dy portierë shumë të mirë, për fat të keq, i dyti i bie të qëndrojë në pritje. Siç ka ndodhur më parë me ju dhe me Foto Strakoshën…
Jo, prapë nuk jam dakord me ju. Është fat i mirë. Shumë i mirë që të kesh dy portierë të tillë. Do të ishte
fat i keq nëse do të ishin dy portierë të këqij ( qesh…).
Nëse e keni ndjekur futbollin shqiptar, keni piketuar ndonjë portier që mund të bëjë kalimin jashtë vendit?
Për të qenë i sinqertë, kam pak mundësi të ndjek kampionatin shqiptar. Mirëpo, një portier të Vllaznia.
Selmani?
Kam lexuar dhe parë video për të, i cili ka disa cilësi të mira. Megjithatë, të gjithë ne duhet të ndryshojmë mentalitetin.
Mentalitetin në lidhje me çfarë?
Që gjithmonë të shmangim mentalitetin që na ka penalizuar në të kaluarën. Në të kaluarën kishim probleme sepse na duhej kohë e gjatë që të përshtateshim. Tashmë, lojtarët shqiptarë janë më afër realitetit europian. Dhe këtë mundësi na e shton më shumë edhe fakti që shohin më shumë ekipe apo futbollistë të huaj. Gjithashtu, shumë djem të rinj nga Shqipëria janë larguar në skuadra jashtë vendit nëpër botë duke provuar dhe parë se si funksionojnë gjërat për profesionistët. Mbi të gjitha, është fat i madh që kanë një Kombëtare ku të gjithë çunat janë profesionistë dhe që le të themi, mund të shërbejnë edhe si udhërrëfyes për të rinjtë. Pra, Kombëtarja dhe lojtarët nuk janë vetëm idhuj të fëmijëve, por edhe si shembuj për të rinjtë që merren me këtë sport.