Strakosha si pasardhës i Bufonit, shqiptari 100-fishon vlerën e tij Portieri i Shqipërisë, në listën e dëshirave të Juventusit

Thomas Strakosha ka ditur që ta vendosë me punë dhe duke folur vetëm në fushë emrin e tij, në vitrinën e gjërave më të çmuara dhe më të dëshiruara të Serisë A. Portieri i skuadrës së Lacios, djali i një kampioni legjendar për futbollin dhe portën shqiptare, Foto Strakosha, po hedh hapa të sigurt dhe të mëdha si të të atit, ndoshta me një karrierë të projektuar në vazhdim edhe më të pasur dhe mahnitëse se ajo e babait të tij. Mbërritja te Lacio nga Panioniosi si një "i panjohur" dhe rritja e tij e shpejtë nga radhët e të rinjve kryeqytetas, më pas Salernitana dhe sërish në ekipin bardhekaltër, bëri që Strakosha të mos i shpërdorojë asnjë nga bonuset që i dhanë trajnerët e tij. Dhe tashmë po korr gjithë mundin që ai ka mbjellë pas pesë viteve të lodhshme pune në Itali. I talentuar, por edhe shumë serioz e deciziv edhe në drejtimin e repartit të mbrojtjes, jo vetëm mes shtyllave, 22-vjeçari i lindur në Athinë, por që kurrë nuk deshi që ta mohonte kombësinë e tij, tashmë është bërë një objekt dëshirash i rëndësishëm edhe për një klub madhështor, për "diktatorët" e Serisë A, në këto gjashtë vite të fundit. Juventusi, i cili në fund të këtij sezoni do të përshëndesë legjendën e gjallë, Xhanluixhi Bufon, edhe pse ka një portier të afirmuar si polaku Vojceh Shezni në stol, ka hedhur "grepat" që tani në drejtim të Thomas Strakoshës. Paraqitjet bindëse, sidomos përballë bardhezinjve në dy raste, Superkupa e Italisë dhe në kampionat së fundmi, duke i pritur një penallti edhe Dibalës, e cila i dha fitoren Lacios, e kanë shenjtëruar Thomasin si një prej "gardianëve" më të fortë në Itali. Dhe në Torino nuk lejojnë që talente si shqiptari t'i shpëtojnë lehtë. Drejtori i përgjithshëm bardhezi, Xhuzepe Marota, po e vëzhgon dhe po e vlerëson me kujdes situatën e Thomas Strakoshës, i cili që kur mbërriti nga Panioniosi në verën e vitit 2012 për 75 mijë euro dhe pas xhirimit nga Lacio te Salerninata u "shit-ble" për 300 mijë euro, tani vlera e tij llogaritet të jetë 100fishuar. Duke parë vlerat e mbrojtësit ekstrem, drejtori sportiv, Igli Tare, e vlerëson "diamantin" e tij të radhës, të paktën 30 milionë euro. Natyrisht, që një shifër e tillë nuk e tremb Juventusin, nëse vendos që të investojë te Strakosha, sepse realisht ai i meriton të gjitha këto parà, me çfarë ka treguar deri tani.