Haxhiu: Flamurtar i denjë, e ndjek Skënderbeun deri në fund
Ish-lojtari: Jemi klubi më i penalizuar nga FSHF në Shqipëri
Saimir Haxhiu e shikon nënkampion Flamurtarin këtë sezon. Në një prononcim të dhënë për "Panorama Sport", ish-futbollisti vlonjat dhe ish-anëtari i bordit drejtues të klubit, analizon Flamurtarin e këtij sezoni. Haxhiu vlerëson punën e mirë që u bë qysh në fund të sezonit. Ish-futbollisti e shikon deri në fund të këtij sezoni Flamurtarin si ndjekës të Skënderbeut në vendin e dytë. "Sipas asaj çfarë kam parë deri tani, shoh një Flamurtar të fortë, një ekip të organizuar mirë me kualitete brenda dhe kjo nuk është e rastësishme. Ka filluar një punë e mirë që fundsezonin e kaluar. Përgatitje serioze në fazën përgatitore, qëndrimin më pranë se çdo herë tjetër të presidentit të skuadrës. Pra, me një fjalë, skuadra po meriton gjithçka jep në fushën e lojës me gjithë penalizimet në kurriz të saj. "Unë e kam thënë që në fillim, pa frikë, se e shikoj Flamurtarin këtë vit në ndjekje të Skënderbeut deri në fund të kampionatit", tha fillimisht Haxhiu.
DËNIMI- Ish-anëtari i bordit drejtues të klubit, Saimir Haxhiu, është i bindur se Flamurtari është ndëshkuar për shkak të deklaratave të Idrizit
kundër FSHF. "Për fat të keq, ky Flamurtar i mirëorganizuar është penalizuar shumë, duke dashur të ulet entuziazmi i një qyteti të tërë. Duket haptazi që ka një ndëshkim për shkak të deklaratave të Idrizit në drejtim të FSHF, por të mos harrojmë se kemi qenë i vetmi klub shqiptar
që penalizohemi me heqje pikësh, dënimi i fushës pa spektatorë apo gjyqtarë dhe persona të tjerë që e kanë bërë pis ndërgjegjen e tyre më dashje në dëm të Flamurtarit. Unë mendoj se të gjitha këto kanë ndikuar në mungesën e emocionit për të ndjekur ndeshje të
Superiores", u shpreh Haxhiu.
SKËNDERBEU- Saimir Haxhiu shprehet se kuqezinjtë kanë një grup të mirë lojtarësh. "Pothuajse i kam ndjekur me vëmendje të gjitha skuadrat këtë fazë. Flamurtari bën diferencën duke pasur skuadër me djem të lartë, përgatitur fizikisht dhe me një stol rezervash të kompletuar. Kjo i jep garanci, por dhe më ndonjë përforcim në merkaton e janarit me ndonjë lojtar organizator me nivel të lartë, do e shihja nënkampion këtë vit Flamurtarin", tha Haxhiu. Haxhiu shikon në fushën e lojës një Flamurtar të barabartë me Skënderbeun, ndërsa tha se do t'i pëlqente ta shihte me spektatorë këtë ndeshje. "Ndeshjen me Skënderbeun do të më pëlqente ta shihja me spektatorë, pasi e meriton të jetë e tillë. Flamurtari ka gjithë potencialin të përballët si i barabartë në fushën e lojës", vijoi më tej Saimir Haxhiu.
PRIVATIZIMI- Procesi i privatizimit të Klubit të Futbollit Flamurtari ka ngecur për probleme teknike. Ishanëtari i bordit të klubit vlonjat, Saimir Haxhiu, tha se Këshilli Bashkiak e ka hapur dritën jeshile. "Tashmë procesi i privatizimit është problem teknik, mesa di unë. Kjo, pasi drita jeshile është dhëne në Këshillin Bashkiak. Ju e dini që, personalisht, edhe duke debatuar me kryetarin e bashkisë, kam qenë që të mos vonohet si proces në interes të futbollit", përfundoi Haxhiu. Ermal Sika