Lushnja, për të thyer tabunë e “Loro Boriçi”-t
Barazimi i fundit me shkodranët në transfertë, i arritur në vitin 2009, me gol të Bubeqit
Orgest Gava parashikon që faza e dytë do të jetë plotësisht ndryshe për Lushnjën. Mesfushori elbasanas deklaron se verdhejeshilët do bëjnë çmos që të grumbullojnë sa më shumë pikë të jetë e mundur dhe rrjedhimisht të largohen nga zona e rrezikut. Në një deklaratë të dhënë për "Panorama Sport", 27-vjeçari shfaq bindjen se skuadra do të ngjitet gradualisht në tabelë. "Shpresojmë që të bëjmë një fazë të dytë më të mirë, duke filluar që nga ndeshja me Vllazninë. Ekipi po përgatitet me impenjim të madh dhe do të vlerësojmë maksimalisht çdo sfidë, që Lushnja të grumbullojë sa më shumë pikë në fazën e dytë. Shpresojmë ngjitjen në tabelë përmes rezultateve pozitive", është shprehur mesfushori. Ky i fundit është kthyer në një titullar të padiskutueshëm, ndërsa pas minutave që mori në debutim me Vllazninë, nuk ka humbur asnjë prej 8 ndeshjeve të tjera. Një autogol, një gol dhe një karton i verdhë 27-vjeçarit të verdhejeshilëve, është ky bilanci i Gavës me lushnjarët. Axhenda - Pas ngarkesave në fillimjavë dhe ndeshjes së kontrollit brenda grupit, trajnerit Hysen Dedja dje i la pushim të tijtë. Lushnja do t'i rikthehet vetëm sot punës për javën anti-Vllazni, prej të cilës presin një tjetër rezultat pozitiv. Shkullaku dhe Ruço pritet që të stërviten me grupin sot pasdite. Të dy futbollistët e dëmtuar kanë nisur stërvitjen individuale përmes vrapimeve. Por, kanë konfirmuar se sot do të jenë me grupin duke lënë pas dëmtimet.
Precedentët - Tradicionalisht, Lushnja ka hasur vështirësi në "Loro Boriçi". Verdhejeshilët njohin vetëm një pikë në 5 ndeshjet e fundit në transfertë. Barazimi i vetëm i përket 16 majit të vitit 2009, kur Sinani shënonte për Vllazninë dhe Bubeqi për Lushnjën. Fitorja e fundit e kuqebluve është në 15 dhjetorin e 2013-ës, 2- 0 me një dygolësh të kroatit Bushiç. Alban Alushi