“Dhuratat”, ja plani i Tiranës
Për të siguruar ngjitjen e menjëhershme dhe mbajtur larg rivalët, Ze Maria vendos objektiva
Tirana synon ngjitjen e menjëhershme në Kategorinë Superiore dhe, për t'ia dalë, kanë hartuar një plan të qartë. Sigurisht që ngjitja nuk mund të realizohet vetëm me një projekt të hedhur në letër, por me rezultate në fushën e lojës. Deri më tani, kryeqytetasve u kanë dalë mirë llogaritë, paçka se pas 6 fitoreve radhazi, u "thyen" prej Bylisit. Pasi pësuan humbjen e parë dhe të vetme, "rrethi" ka filluar që të ngushtohet për ta. Nëse bardheblutë duan që të realizojnë me sukses objektivin final, gabimet duhet të jenë sa më të vogla, ose më mirë akoma duhet që të evitohen. LLOGARITË
Ze Maria mësohet se u ka vendosur limite futbollistëve të tij. Gjatë deklaratave të tij, shpeshherë trajneri i bardhebluve ka thënë: "Skuadra e di mirë se sa pikë duhet të lërë në dy faza e para". Kur pyetej se sa pikë mund të "falte" Tirana rrugës, ai prerazi përgjigjej: "Është sekret grupi!". Edhe pse për mediat thoshte gjithnjë se donte maksimumin e pikëve për dy fazat e para, pra 54 të tilla në 18 ndeshje, mësohet se braziliani, në krye të herës, u ka vendosur një objektiv të tijve. Vetëm 6 pikë mund të lënë rrugës kryeqytetasit. Tri të parat ikën sikundër dihet ndaj Bylisit dhe me një logjikë të thjeshtë, tashmë mund të "dhurojnë" edhe 3 pikë të tjera, që të jenë brenda misionit të vendosur prej Hoze Marselo Ferreiras. Kjo mund të përkthehet me një humbje ose me tri barazime. Më shumë se kaq, janë të ndaluara. PASOJAT
Gjithkujt mund t'i lind rrjedhimisht pyetja: dhe çfarë do të ndodhë nëse nuk realizohet ky plan? Shumë e thjeshtë. Faza e tretë, që shoqërohet me përgjysmimin e pikëve, do bënte që rivalët jo
vetëm t'i afroheshin me shumë Tiranës, por pse jo, mund të ndodhë edhe ndonjë "rokadë" për kreun. Surprizat janë të pashmangshme dhe sidomos kur dihet që janë edhe 11 ndeshje për t'u luajtur deri në mbyllje të dy fazave të para, kur futet
në lojë edhe rregullorja e FSHF-së. Ndaj forma e vetme për të mbajtur larg rivalët, bardheblutë janë të "dënuar" që të fitojnë 11 ndeshjet e radhës, për të qenë të qetë dhe të sigurt për 8 ndeshjet (me sistem vajtje-ardhje) që përmbyllin Kategorinë e Parë.