Vllaznia në hall, bllokohet për 170 milionë lekë
Klubi shkodran prish marrëveshjen me Tatimet, ngrijnë sërish llogaritë bankare Nuk ka para për shlyerjen e borxheve, rikthehet paniku për rrogat
Klubi i futbollit Vllaznia vijon që të ketë probleme me bllokimin e llogarive. Situata financiare vazhdon të jetë e turbullt pranë klubit shkodran. Kjo, pasi llogaritë bankare të klubit janë ende të bllokuara. Një fakt i tillë bëhet i ditur edhe nga drejtori i Drejtorisë Rajonale të Tatim- Taksave Shkodër, Hysen Hysaj. "Klubi Vllaznia ka pasur një aktmarrëveshje me Drejtorinë Rajonale të Tatim-Taksave Shkodër, që në fakt deri në një periudhë i ka qëndruar strikt. Por, më pas, ka pasur devijime të kësaj marrëveshjeje. Kështu, në momentin që nuk i ka qëndruar likuidimit të kësteve që ishin parashikuar, është prishur kontrata dhe ia kemi bllokuar llogaritë klubit Vllaznia", u shpreh fillimisht drejtori Hysaj në prononcimin e tij për mediat. Nënshkrimi i një marrëveshjeje të re është skenari më i mundshëm dhe Hysaj shton: "Po bëjmë maksimumin që të krijojmë të gjitha mundësitë e mundshme konform ligjit, për të mos u penguar për asnjë moment veprimtaria e këtij ekipi. Dashamirësia ekziston dhe pa dyshim që edhe drejtuesit e klubit dhe ata të bashkisë janë të bindur se do të gjendet një zgjidhje.
Për këtë arsye, pritet të shohim si do të rrjedhin ngjarjet në ditët në vazhdim", u shpreh Hysaj në reagimin e tij për mediat kur është pyetur në lidhje me çështjen e financave të Vllaznisë.
KLUBI - Nga ana tjetër, drejtues të klubit patën theksuar
se nuk kanë zgjidhur problemet e bllokimit të fondeve, sidomos me degën e Tatim- Taksave. Mirëpo, me sa duket, drejtuesit e klubit, nisur edhe nga mungesa e fondeve, kanë prishur marrëveshjet që mund të ndikojnë direkt
edhe në aspektin financiar të lojtarëve të ekipit. Burime zyrtare në klubin shkodran konfirmojnë se borxhi ndaj Drejtorisë së Tatim-Taksave është 170 milionë lekë të vjetër. Me sa duket, Vllaznia e këtij sezoni nuk ka probleme vetëm rezultatesh, por
edhe të tjera që i përkasin aspektit jashtë fushe. Nëse skuadra do të haset edhe me këto problematika financiare, atëherë situata edhe për rezultatet mund të pësojë një përkeqësim. Tani u duhet drejtuesve të klubit që të mendojnë për aspektin financiar të kësaj skuadre. Shkodranët kanë probleme me financat prej disa vitesh. Klubi aktualisht menaxhohet dhe financohet nga Bashkia e Shkodrës, në një kohë që është kërkuar shumë herë që të privatizohet dhe të hyjnë në lojë biznesmenë që të
bëjnë të mundur rikthimin e skuadrës në pretendente për të fituar tituj. Kujtojmë që një sezon më parë, ekipi i shpëtoi rënies në Kategorinë e Parë vetëm në ndeshjen e fundit dhe tashmë kërkon që kjo histori të mos përsëritet më. Por, në të gjitha kampionatet e fundit kur ekipi financohet nga Bashkia, ka pasur probleme për sa i përket mbijetesës dhe e ka arritur atë vetëm në javët e fundit. Në javën e ardhshme, Vllaznia do të luajë kundër Lushnjës, ku do të kërkojë fitoren për të ngjitur shkallët në klasifikim.