Astrit Ajdareviç: Mbiemrin e kam ndërruar, por jam shqiptar
Mesfushori kuqezi: E kam Hajdari, por u ndryshua prej... luftës
Astrit Ajdareviç është risia e Kombëtares Shqiptare për miqësoren ndaj Turqisë. Dje, në një bisedë për kanalin zyrtar të FSHF- së në "YouTube", mesfushori nga Prishtina rrëfeu ditët e para si kuqezi. "Të gjithë më kanë pritur mirë, jam i kënaqur që bëj pjesë në Kombëtare. Të them të drejtën kam pritur disa vite për të qenë te Shqipëria. Jo vetëm unë, por edhe familja ime është e lumtur që tashmë do të vesh fanellën kuqezi. Do të jap gjithçka për këtë fanellë", ka thënë fillimisht mesfushori që luan me AEK- un e Athinës.
KRENARIA - "Kënaqësia është e madhe, shumë kohë kam pritur për të ardhur këtu. Kam luajtur me Suedinë për disa vite, jo vetëm në Kombëtaret e moshave aty, por edhe në skuadra të rëndësishme. Kam qenë edhe kapiten për një kohë të gjatë. Vërtet jam rritur dhe formuar si futbollist në Suedi, por unë ndihem shqiptar. Të gjithë e dinë këtë gjë dhe unë gjithmonë kam thënë se jam shqiptar sa herë më kanë pyetur. Do të vazhdoj ta them gjithmonë. Jam krenar për këtë", theksoi Ajdareviç. MBIEMRI - Pse Ajdareviç dhe a ndihet keq kur e krahasojnë me mbiemrat sllavë? Mesfushori tregon: "I kuptoj tifozët, por unë dhe familja ime gjithmonë e kemi ditur kush jemi. Mbiemri im është Hajdari dhe jo Ajdareviç, por për shkak të luftës e kemi ndërruar. Gjithmonë e kanë ditur që jam shqiptar, por tani edhe më shumë akoma". PËRSHTATJA - "E kam shumë të lehtë për t'u përshtatur në Kombëtaren Shqiptare. Është grup i mirë dhe këtë e kam vërejtur në këto pak ditë që jam këtu. Unë nuk i trembem konkurrencës. Në çdo skuadër, qoftë klub apo kombëtare, e njëjta situatë është. Për mua kjo është shumë normale dhe do të mundohem të jap maksimumin tim. Kam 15 vite që luaj futboll profesionist dhe konkurrenca nuk është diçka e re për mua. Më shumë kam luajtur si mesfushor ofensiv. Shpresoj të kem minutat e mia edhe në Kombëtare duke treguar kualitetin tim. Shqipëria ka një grup të mirë lojtarësh dhe këtë e tregoi në Europianin e 2016ës. Kemi futbollistë të talentuar, jo vetëm që janë aktualisht, por edhe të tjerë që luajnë në Europë. E theksoj, për mua është krenari që jam pjesë e këtij ekipi", përfundoi 27vjeçari nga Prishtina.