Lika nuk merret me uruguaianët, por tregon Luftëtarin e tij
Trajneri: Tani jemi gati të luftojmë si të barabartë me çdo rival
Të gjithë futbollistët gjirokastritë e kanë pranuar se me ardhjen e Hasan Likës në krye të Luftëtarit janë bërë përmirësime të dukshme në të gjitha drejtimet, kryesisht në aspektin stërvitor. Ndaj ekipi po shkon drejt formës së sezonit të shkuar. Vetë trajneri Hasan Lika, për situatën në ekip dhe mundësitë që ka skuadra në të ardhmen, deklaroi: "Nuk mund të shprehem se në momentin që mora drejtimin e skuadrës, e gjeta atë të çorganizuar apo të papërgatitur. Nuk është etike të flasësh për punën e të tjerëve, por shumë gjëra në ekip kanë ndryshuar për mirë. Çdo trajner ka filozofinë e punës së tij. Funksionon më mirë kjo e tanishmja. Kuptohem mirë me futbollistët si në stërvitje ,në lojë, por edhe në kohën e lirë. Konstatoj se futbollistët luajnë me dëshirë për ngjyrat e klubit, veten e tyre, por edhe në respekt ndaj meje. Është normale që një skuadër sa herë ndërron trajner, ndryshon për mirë. Në ekip ka futbollistë shumë të mirë që i kam njohur edhe më parë si edhe shumë të rinj, të cilët janë objekt i punës sime të përditshme. Konstatoj se lojtarët veprojnë me shumë dëshirë dhe nuk u flas shumë për një veprim apo sjellje të caktuar. Ajo që dua t'u imponoj atyre, është përqendrimi në lojë. Jo se u mungon shumë grinta gjatë lojës apo lëvizshmëria, por për aq ndeshje sa jam në drejtim, më duhet që gjatë lojës t'u qëndroj "te koka" sepse ka momente shpërqendrimi. Sa herë që i vendos të luajnë midis tyre, u kam bërë me dije se në futboll duhet të luhet përgjatë 90minutave. Mjaftojnë disa sekonda që të pësosh gol, kur humbet kontrollin e topit në mbrojtje dhe më pak se kaq në sulm, të mos shënosh golin sepse nuk je duke e ndjekur aksionin apo e vonon topin në gjuajtje. Shpresojmë që në vazhdim të marrim maksimumin e pikëve në fushën tonë dhe të mos luajmë në ndeshjet e transfertës si inferiorë, por me besim për të mos dalë pa pikë. Na duhet të grumbullojmë sa më shumë pikë në këtë fazë, mbasi për fazën e tretë, që fillon vitin tjetër, do të jemi edhe më të plotë, sidomos në repartin ofensiv. Do të aktivizohet Vasil Shkurtaj në repartin e sulmit ,por do të bëjmë të tjera plotësime të nevojshme pasi kemi mungesë futbollistësh. Ndaj Teutës përgatitjet i kemi maksimale dhe shpresojmë te fitorja. Mundet të kemi vetëm një mungesë nga titullarët, Rrocën, për arsye shëndetësore. Gjithë të tjerët janë të gatshëm. Ndërprerja e kampionatit për ne ishte si me porosi dhe tani mund të them se Luftëtari është gati të luajë si i barabartë me çdo skuadër duke pretenduar një rezultat pozitiv". Tomor Shehu