Flamurtari-Skënderbeu shtyhet prej...Lilajt
Mesfushori dhe sulmuesi Soue janë me përfaqësueset
Skënderbeu do të luajë në Vlorë përballë Fla murtarit ditën e enjte për të çelur fazën e dytë të kampionatit. Një shtyrje e ndeshjes nga e mërkura në të enjten ka plotësuar pritshmëritë në kampin bardhekuq. I tillë ka qenë vendimi i radhës i FSHF-së që pasi u fol fillimisht për të luajtur takimin të mërkurën në orën 17: 00, u vendos më vonë që takimi të shtyhet me 24 orë.
VENDIMI - Duket se FSHF-ja ka marrë parasysh këtu faktin që Skënderbeu është i vetmi klub i dëmtuar nga grumbullimet e Kombëtares, pasi janë katër lojtarë të grumbulluar me përfaqësueset respektive. Nisur nga fakti që një prej lojtarëve kryesorë, Sabien Lilaj, pritet të mbërrijë në Rinas vetëm në orën 20:00 pas ndeshjes me Turqinë, ishte thuajse e pamundur që të luante normalisht vetëm pak orë më vonë në Vlorë. Ndërsa nga ana tjetër Ali Soue kthehet nga impenjimi me kombëtaren e Gambias vetëm ditën e mërkurë në mëngjes. Për këto arsye duket se shtyrja e ditës së ndeshjes nga e mërkura në të enjten i shkon përshtat Skënderbeut që do të ketë në dispozicion dy prej lojtarëve kryesorë, Lilajn edhe Souenë. Më pas do të jetë zgjidhja e trajnerit Ilir Daja nëse ata do të luajnë titullarë në Vlorë apo do e nisin ndeshjen nga stoli. Gjithsesi, duket shumë e vështirë që Daja t'u besojë minuta të plota të dy lojtarëve që për hir të së vërtetës nuk kanë pushuar kurrë gjatë fazës së parë. Pritet që të paktën vetëm një mes Lilajt dhe Souesë ta nisë ndeshjen si titullar. Korçarët kanë bërë një paraqitje shumë të mirë në fazën e parë të kampionatit, ku kanë arritur nëntë fitore dhe vetëm një barazim. Skënderbeu është në krye të grupit dhe ka treguar se këtë sezon duket shumë e vështirë që të rivalizohet nga ekipet e tjera. Me këtë ritëm, korçarët janë drejt titullit të tetë kampion, ndërsa një vit më parë e humbën duelin me Kukësin.