Lëv: Kishim 90 mijë tifozë kundër, nuk luhet aq lehtësisht

"Nuk dinim ku ta çonim topin, tani mendjen te Franca"

Joakim Lëv vendos ta shohë gotën gjysmë plot pas baraz imit pa gola me Anglinë. Ai thotë se testoi të rinj, por nuk ishte e lehtë të luaje përballë 90 mijë tifozëve. Trajneri i Gjermanisë thotë se tani duhet të përgatiten për Francën, e cila është akoma më e fortë.

NDESHJA- "Të dyja skuadrat u përpoqën të ishin shumë të kujdesshme në fazën mbrojtëse dhe nuk menduan shumë për sulmin. Megjithatë, ne i kishim mundësitë për të shënuar në pjesën e parë. Na munguan në të dytën, sepse Anglia filloi të luante më shpejt".

HALSHTENBERG- "Bëri një ndeshje të mirë dhe më pëlqeu shumë. Por kishte vetëm dy seanca stërvitore me ne. U përgjigj mjaft pozitivisht në fushën e lojës. Por mos harroni që nuk është e lehtë të luash përballë 90 mijë tifozëve. Jam i kënaqur edhe me Gyndoganin".

PROBLEMET- "Ajo që nuk më pëlqeu, ishte fakti që nuk dinim çfarë të bënim me topin në këmbë. Ndonjëherë humbëm më shumë topa sesa duhet, por jam i sigurt që do të përmirësohemi dhe duhet të punojmë në këtë aspekt. Nuk funksionuam shumë mirë në ndërtimin e aksioneve, por shpresoj që lojtarët ta kenë kuptuar dhe ta korrigjojnë".

GËCE- "Po e planifikoj për ndeshjen e ardhshme. Nuk e di nëse do të jetë titullar që nga minuta e parë, apo gjatë sfidës. Shumë shpejt për ta vendosur".

FRANCA- "Mendoj që Franca është një ekip më i fortë se Anglia. Anglia është përmirësuar shumë krahasuar me disa vite më parë, por Franca ka sulmues dhe mesfushorë të klasit botëror. Ata mund të na hapin më shumë punë sepse kanë lëvizshmëri më të madh sesa Anglia.