Flamurtari-Skënderbeu ndryshon prej... Lilajt
Kombëtaret detyrojnë korçarët të këmbëngulin për spostimin e ndeshjes
Skënderbeu do të luajë në Vlorë përballë Flamurtarit ditën e enjte për të çelur fazën e dytë të kampionatit. Një shtyrje e ndeshjes nga e mërkura në të enjten ka plotësuar pritshmëritë në kampin bardhekuq...
Apolonia dhe Flamurtari kanë shfrytëzuar ndërprerjen e kampionatit për të zhvilluar një ndeshje kontrolli midis tyre. Ashtu si në kampionat, fierakët vazhdojnë t'i kenë "gangrenë" ndeshjet e zhvilluara në shtëpi. Apolonia, edhe pse ka shënuar e para që në start, nuk ka mundur ta mbajë rezultatin. Flamurtari pas pësimit të golit, luan mirë e me kujdes dhe me theks sulmues krijon epërsi ndaj vendësve dhe shënojnë dy gola në pjesën e parë duke kontrolluar lojën në të gjitha aspektet. Apolonia e fillon vrullshëm lojën, shënon në "tunel" duke kaluar në avantazh që në minutën e parë me anë të sulmuesit Krasniqi, që shënoni një eurogol. Pavarësisht kësaj, fierakët nuk kanë mundur ta gëzojnë avantazhin, pasi Flamurtari nuk pajtohet me humbjen dhe barazon me anë të Bushiç në minutën e 32- të. Pas golit të barazimit vlonjatët marrin zemër dhe në minutën e 38- të shënojnë edhe golin e dytë me anë të Hoxhajt.
TAKIMI- Të besuarit e trajnerit Kashami e kanë nisur më mirë miqësoren e djeshme dhe arrijnë që nëpërmjet një kundërsulmi të shpejtë, të gjejnë rrugën e rrjetës me të Krasniqit, pa u mbushur mirë minuta e parë. Krasniqi me një gjuajtje ballore mbi vijën e zonës e dërgon topin në trekëndëshin e djathtë të portierit të Flamurtarit, Nurkoviç. Goli duket se u jep krahë fierakëve që vazhdojnë të luajnë mirë dhe të krijojnë edhe raste të tjera shënimi, por pa arritur t'i konkretizojnë, sa prej nxitimit e pasaktësisë së tyre, aq dhe për meritë të mbrojtjes mike, e cila nuk lë hapësira në zonën e saj. Nga ana tjetër vlonjatët rrisin lojën e tyre dhe nëpërmjet kundërsulmeve të shpejta me protagonist Kamara dhe Shehaj, që
vihen në kërkim të golit të barazimit. Loja fiton më shumë ritëm dhe emocione, ndërkohë që sulmet vijojnë sa në njërën portë në tjetrën. Pas minutës së 30- të, epërsia kalon në anën e Flamurtarit që luan më mirë dhe insiston nëpërmjet kundërsulmeve
që të shënojë e barazojë rezultatin. Një gjë të tillë Flamurtari e realizon vetëm në minutën e 32-të, kur ndërmerr një kundërsulm të shpejtë dhe topi shkon te Bushiçi që nuk fal, por gjuan me qetësi e saktësi duke e dërguar topin në rrjetë dhe duke barazuar
rezultatin në 1- 1. Pas pësimit të golit, Apolonia kërkon të reagojë, por pa mundur dot të shënojë, pasi Flamurtari vazhdon të luajë mirë, të qarkullojë topin e të ndërmarrë kundërsulme të shpejta e të rrezikshme. Në minutën e 38-të Kamara, lojtari më i mirë në fushë për të dy ekipet, pason bukur në hyrje të zonës te Hoxhaj që shënon golin e dytë e të avantazhit për vlonjatët. Minutat e mbetura të pjesës së parë u karakterizuan nga një lojë e mirë e të dy ekipeve dhe me theks sulmues, ku Apolonia dëshironte të barazonte rezultatin, ndërsa Flamurtari ta thellonte akoma më shumë atë. Asnjëra e as tjetra nuk ja arrijnë qëllimit dhe kështu pjesa e parë mbyllet me fitoren e Flamurtarit me rezultatin 1- 2. Fraksioni i dytë i ndeshjes fillon me zëvendësime të shumta nga të dy trajnerët. Ritmi i lojës pëson një rënie në këtë pjesë, megjithatë vlonjatët ruajnë epërsinë ndaj vendasve. Apolonia sulmoi më shumë dhe krijoi raste shënimi, por pa mundur që të finalizojë. Kështu, i gjithë takimi përfundon me fitoren e Flamurtarit me rezultatin 1-2.