Nuk mjaftojnë tifozët me urdhër, ngecin Shpresat
Kombëtarja U-21 barazon me Irlandën e Veriut, zbehen shanset S’mbajmë dot golin e Ramadanit, ndëshkohemi sërish në fund
Tifozët me detyrim nga FSHF-ja nuk i bëjnë punë Kombëtares U21, që dje "flirtoi" me fitoren, por për herë të dytë u ndëshkua nga Irlanda e Veriut në frymën e fundit. Vetëm barazim 1-1, në një takim që u duk se po shkonte sipas parashikimeve të kuqezinjve, që shënuan në minutën e 83-të me anë të Ylber Ramadanit. Në pjesën e parë, skuadra e Alban Bushit ishte larg pritshmërive, ndërsa në të dytën e rriti nivelin e lojës. Pas 5 ndeshjeve të zhvilluara në grupin 2 eliminator, tashmë Shqipëria rrezikon të zbresë në vendin e pestë, teksa më 14 nëntor, kur sipas kalendarit do të pushojë, rivalët do të jenë në fushë.
PJESA E PARË - Bushi hedh në fushë një skuadër sulmuese, me treshen Abazaj, Çekiçi e Hebaj nga minuta e parë. Irlanda e Veriut zgjedh të presë kundërshtarin, teksa më shumë luan me topa të gjatë. Rasti i parë i rrezikshëm regjistrohet në minutën e 8-të, kur Bare lëviz mirë në afërsi të zonës dhe gjen të lirë Abazajn, i cili godet me kokë, por nuk gjen kuadratin. Loja është e ekuilibruar, me miqtë të vendosur mirë në fushë. Në minutën e 21-të është Çekiç që lëshon një predhë nga distanca, por portieri irlandezoveriorë pret i sigurt. Miqtë bëhen të frikshëm me daljet në kundërsulm dhe i afrohen golit në dy raste me protagonistë Xhonson dhe Smith. Rasti më i pastër i kuqezinjve është ai i minutës së 30-të, kur Abazaj shërben te Hebaj dhe ky i fundit godet me të djathtën, por pret i sigurt portieri Mishell.
PJESA E DYTË - Agim Zeka është "asi nën mëngë" i Bushit. Mesfushori me tipare sulmuese futet në fushë, teksa në dhomat e zhveshjes mbetet Hebaj. Çekiçi jep sinjalin e parë, ndërsa më pas është momenti i Zekës, që shfaqet i rrezikshëm në tri raste. Më i veçanti është ai i minutës së 73-të, kur pasi driblon dy kundërshtarë, gjuan fuqishëm me të majtën, por portieri mik bën një grushtim spektakolar. Goli dukej çështje kohe dhe kështu ndodh, kur pas tentativave të Cekës dhe Ndojit për të gjetur portën, është Ramadani që godet bukur me të djathtën dhe shënon. Mirëpo, kur pritej që kuqezinjtë të administronin lojën, një krosim nga e djathta në qendër të zonës, kap "mat" mbrojtjen e ekipit të Bushit. Lavery barazon shifrat pas goditjes së saktë me kokë. Minutat e mbetura nuk kanë më histori dhe gjithçka mbyllet 1-1.