Stërvitje taktike, ideohet skuadra anti-Turqi

Në tri ditët e para trajneri Panuçi e bazoi punën e tij te përgatitja fizike duke bërë një lloj testimi për futbollistët dhe gjendjen e tyre fizike në këtë mesedicioni. Nga dje, tekniku ka reduktuar seancat, si dhe është përqendruar te përgatitja taktike e kuqezinjve. Në seancën e pasdites tekniku ka zhvilluar një minindeshje ku ka testuar edhe rreshtimet taktike që do të përdorë në miqësoren kundër Turqisë. Nga sa është provuar dje, pritet që Në portë të jetë Berisha dhe përpara tij katërshja Hysaj-Ajeti-Mavraj dhe Lenjani. Nuk është kristalizuar ende me garanci maksimale formacioni, ndërsa ka dy dilema për mënyrën se si do të rreshtohet ekipi në fushën e lojës. Për momentin duket se ka dy dilema. Një është për qendërmbrojtësin që do të shoqërojë Mavrajn në fushë, teksa Ajeti është më i avantazhuar sesa Veseli. Por, nëse në mbrojtje nuk përbën shumë diferencë ky balotazh, në mesin e fushës përzgjedhja e njërit apo tjetrit vendos edhe skemën. Në përzgjedhjen e modelit 4- 4- 1- 1 ose përkthyer edhe 4- 2- 3- 1 në futbollin modern, Xhaka e Memushaj shihen më të avantazhuar sesa Qaka e Ajdareviç. FORMACIONI I MUNDSHËM

Lilaj e Xhaka pritet që të vendosen përpara mbrojtjes dhe përpara tyre të jetë treshja më e avancuar Roshi, Memushaj e Grezda. Të tre kuqezinjtë do të vihen në mbështetje të Armando Sadikut në krye të repartit të avancuar. Me postimin e Memushajt ky modul shndërrohet lehtësisht në 4- 4- 1- 1 ose në 4- 2- 3- 1. Gjithashtu, i mundshëm është edhe moduli 4-3-3, i cili ofron forca të shumta në mesin e fushës dhe një formacion të deklaruar sulmues. Këtë rreshtim trajneri mund ta hedhë në fushë me po të njëjtët futbollistë dhe mjafton spostimi më pas i Memushajt në të majtë të tredhëmbëshit të mesfushës.