Radas thumbon rivalët për titull: Pyetini ata për forcën e Skënderbeut

Mbrojtësi i korçarëve: Mëkati i vetëm, ai barazim me Kamzën

Skënderbeu ka bërë një start të shkëlqyer të kampionatit, duke dhënë më shumë se maksimumin e mundshëm. Pritshmëritë për korçarët në këtë sezon futbollistik janë shumë të mëdha, megjithëse stafi teknik u ka kërkuar lojtarëve që të vlerësojnë maksimalisht çdo takim. Marko Radas, një prej futbollistëve më të rëndësishëm në ekip, në një intervistë për "Panorama Sport", ka analizuar ecurinë e ekipit dhe rivalitetin me skuadrat e tjera të Superiores në këtë sezon futbollistik.

Skënderbeu ka pasur një start mbresëlënës në këtë sezon. Çfarë mund të thoni për këtë ecuri?

Me të vërtetë ka qenë një fazë e parë super. Asnjëherë më parë nuk kishim bërë një rrugëtim të tillë në nëntë ndeshjet e para të kampionatit. Jo vetëm ne, por cilido ekip do ta ketë të vështirë të përsëritë këtë ecuri. Kjo për faktin se në këtë pjesë të kampionatit asnjë ekip nuk është në gjendje të mbajë një linjë të tillë rezultatesh. Mëkat vetëm për atë barazim në Kamzë.

Pse e quani mëkat? Ju "djeg" ai barazim?

Mua personalisht po. Ishte një ndeshje që duhet ta fitonin me çdo kusht, sidomos pas asaj që treguam në pjesën e parë, ku dhe arritëm të shënonim golin e avantazhit. Për nga mënyra sesi ajo ndeshje u luajt dhe si shkoi rezultati, duhet të kishte përfunduar me fitoren tonë. Nëse do të ishte kështu, do të kishim pikët e plota në këtë

fazë të parë. Por gjithsesi ai barazim edhe na shërbeu. Që do të thotë?

Na shërbeu si mësim, që të mos e ulim asnjëherë përqendrimin në ndeshje derisa të mbyllet takimi. E bëmë në Kamzë dhe e pësuam. Më pas gjithçka ishte perfekte.

Por keni fituar ndaj ekipeve rivale në garën për titull...

Ajo është një tjetër meritë e jona dhe një gjë që tregon forcën e vërtetë të Skënderbeut. Nëse doni të dini forcën tonë, pyesni Partizanin e Kukësin, pasi ata dinë diçka më shumë. Kanë qenë dy ndeshje të dominuara në fushë dhe rezultat.

Jeni shtatë pikë larg vendit të dytë. Ju jep komoditet ky pozicion?

Të them të drejtën, është një diferencë e mirë kjo nga ekipet e tjera, por që ne nuk duhet të vetëkënaqemi. Diferenca të bën të jesh i kënaqur, por në krahun tjetër është një thikë me dy presa. Pasi të tilla diferenca nganjëherë të vënë në gjumë dhe mendon se je komod, por në kampionat pikët rikuperohen aq shpejt saqë nuk e merr vesh. Duhet të kemi kujdes, pasi kundërshtarët janë atje për të përfituar.

Cili është çelësi i suksesit të këtij sezoni të mirë që po zhvilloni?

Besoj se përkushtimi dhe përgatitja e mirë që kemi bërë gjatë fazës përgatitore kanë dhënë rezultatet e duhura. Kemi filluar sezonin shumë herët dhe asnjëherë nuk kemi neglizhuar në fazë përgatitore. Kjo më pas na bëri që të kemi një marsh më shumë se ekipet e tjera. Edhe Europa na ka dhënë një tjetër mentalitet. Është e drejtë që ne hyjmë në fushë me mentalitetin europian edhe në kampionat. Kjo bën që diferencat të jenë të mëdha.

Kukësi, Flamurtari apo

Partizani. Kush ju tremb më shumë si rival?

Skënderbeu këtë vit nuk ka frikë nga askush. Nuk i trembemi askujt dhe këtë e them jo me mendjemadhësi, por me siguri. Jemi ekipi më i mirë dhe kjo nuk ka dyshim. E thashë edhe më sipër, për forcën tonë pyesni rivalët se ju tregojnë ata. Ne i respektojmë të gjithë aq sa duhet, por këtë vit kemi shumë uri dhe dëshirë për hakmarrje për të kthyer titullin në Korçë.

Të enjten kundër Flamurtarit me tifozë. E parashikoni një ndeshje të vështirë?

Që ndeshja është e vështirë, kjo nuk ka dyshim, pasi Flamurtari ka një ekip vërtet të mirë e për t'u respektuar në maksimum dhe po merr rezultate mjaft të mira. Ndërsa pjesa e tifozëve mendoj se ishte gjëja më e mirë për të dyja ekipet. Sepse, në fund të fundit, gjithçka bëhet për tifozët. Pa tifozë futbolli nuk ka kuptim.

Megjithatë, objektiv mbetet fitorja, apo jo?

Skënderbeu kudo shkon për fitore, jo vetëm në Vlorë, por në çdo ndeshje. Më pas, futbolli i ka të tria rezultatet. Ne do të kërkojmë fitoren. Nëse ata do të jenë më mirë se ne, do t'u shtrëngojmë dorën. Llazi Saro