Tirana nuk prodhon më sulmues, Morina i fundit i Mohikanëve
Prej 7 vitesh akademia bardheblu në "shterpësi" Të huaj dhe jabanxhinj për t'i dhënë zgjidhje golit
Tirana nuk prodhon më sulmues. "Alarmi" ka prekur jo vetëm klubin bardheblu, por mbarë futbollin shqiptar. Me pahir ekipet tona vazhdojnë ta përqendrojnë vëmendjen në merkato në tregun e huaj. Mungesa e alternativave në vendin tonë është e theksuar (dhe sigurisht që këtu flasim për lojtarë kalibri), ndërsa duhet thënë që një "Fortuzi" nuk del prej vitesh. Shpërndarja gjeografike prek çdo cep të rruzullit tokësor, duke filluar nga Afrika e largët e për të shkuar në Amerikën Latine. Edhe pse Tirana ka një nga akademitë më të mëdha dhe më të organizuara në vend, ka një handikap të madh: nuk po zbulon më "bombera". Sigurisht elementë cilësorë për portën, mbrojtjen apo mesfushën nuk kanë munguar dhe shembulli konkret është ai i Albi Dokës. Por, kur vjen puna te sulmi, rezultati është zhgënjyes. "Shterpësia" është aq e theksuar, sa të bën të mendosh që pritja për një "Fortuzi" të dytë do të jetë e gjatë. Sigurisht që "yjet" nuk u kanë munguar kurrë bardhebluve dhe mjafton të përmendim emra si Vioresin Sinani apo Hamdi Salihi, të cilët kuotën e 20 golave e kishin më shumë se të zakonshme për një sezon. Por, që të dy vinin nga Shkodra. Kështu ka ngjarë në vitet e fundit edhe me Bekim Balajn apo Sokol Cikalleshin, prodhime të Vllaznisë dhe Besës. I suksesshëm mbetet pa dyshim Elis Bakaj, i cili në dy sezone u shpall shënuesi më i
mirë i bardhebluve. Por, sikundër dihet, fantazisti i adaptuar në sulmues, ka dalë nga Partizani. Pas një vëzhgimi të bërë nga gazeta, rezulton se i fundit lojtar që Tirana ka nxjerrë për sulmin është Mario Morina. Shënuesi më i mirë në derbi për vitet e fundit, aktualisht luan për Besën e Kavajës. Prej vitit 2011 e deri më sot, pesha e sulmit të kryeqytetasve u ka mbetur të huajve. Kështu po ndodh edhe këtë sezon, ndërsa kanë ardhur Majkëll Ngoo dhe Junus Sentamu. Kampionati i fundit varej nga këmbët e Ifeani Edeh me Moktar Cise. Që të gjithë afrikanë. Sigurisht që premtues janë edhe emra si Grent Halili apo Mateus Levendi, por është fakt që pesha e golit u mbetet sërish të huajve. Mjafton që të shohësh emrat e sulmuesve që kanë luajtur me Tiranën në 7 vitet e fundit për të kuptuar mungesën e prodhimit vendës.