Mark Markez niset i pari dhe bën gati shampanjën

Mark Markez nuk di të ndalet dhe ndoshta sot përgatitet për festën e titullit kampion. Pasditen e djeshme, piloti i Hondës dhe kryesuesi i Moto GP-së ka siguruar "pole position"-in në pistën e Valencias, gara e fundit e Botërorit, duke ndaluar kronometrat në kohën 1' 29" 897. Edhe pse spanjolli trembi jo pak skuadrën e tij, duke qenë se gjatë kualifikueses hasi edhe në një rrëzim, në fund, e gjithë frika u shpërblye në një gëzim të madh, i cili pritet që të jetë edhe më i madh sot, duke parë se rivali i tij i drejtpërdrejtë për titull, Andrea Doviciozo, u klasifikua vetëm i nënti. Me këtë paraqitje, italiani i Dukatit praktikisht ka vulosur edhe fundin e tij, ndonëse mbi dy rrota asgjë nuk është e sigurt, edhe pse Markez tashmë ka eksperiencën e duhur për të menaxhuar avantazhin e tij në renditjen e përgjithshme. Për më shumë, pista e Valencias është ndër të preferuarit e tij dhe me Doviciozon shumë mbrapa, atij i mjafton vetëm të menaxhojë dhe nuk ka pse të nxitohet për të mbyllur garën, qoftë edhe në vendin e parë. Ndërkohë, për sa u përket provave zyrtare dhe startit të garës, që parashikohet për ditën e sotme në orën 14:00, nga vija e dytë do të niset Johan Zarko me Jamaha, ndërsa i treti Andrea Ianone me Suzuku. Horge Lorenco, me Dukati, i cili dukej i vetmi që mund të bezdiste Markezin për "pole postition"-in, duke parë kohët e tij në provat e lira, nuk shkoi më larg se vendi i katërt. Për Valentino Rosin, i cili e "urren" cirkuitin e Valencias, vetëm koha e shtatë.