Qiratë Qiratë e e Rubios Rubios dhe dhe Gjokës, Gjokës, Flamurtari Flamurtari ultimatum ultimatum nga Përmbarimi Përmbarimi
Përmbarimi jep 30 ditë kohë për të shlyer 6 mijë euro
Një tjetër ultimatum ka mbërritur në zyrat e klubit të Flamurtarit, në bazë të së cilës skuadra duhet të paguajë një shumë prej 6 mijë eurosh. "Panorama Sport" zbulon se bëhet fjalë për një borxh të prapambetur që në kohën kur klubi administrohej nga bashkia dhe kërkohet që të likuidohen nga drejtuesit aktualë të klubit. Shuma në fjalë është një detyrim për shtëpitë me qira të ish- trajnerëve të Flamurtarit, Hulian Rubio dhe Ernest Gjoka, dhe u përket viteve 2012, 2013 e 2014. Burime pranë klubit bëjnë me dije se shkresa që detyron klubin të paguajë detyrimin ka mbërritur dy ditë më parë dhe detyrimi financiar duhet shlyer në 30 ditët e ardhshme, në të kundërt do të veprojë Përmbarimi. Bashkia që administronte klubin më parë, duhet që të shlyente detyrimet e qirasë së shtëpisë për ish-trajnerët, por nuk e ka bërë një gjë të tillë.
RREZIKU - Pas 30 ditëve Flamurtarit rrezikohet që t'i bllokohen llogaritë bankare. Në shkresën e mbërritur nga Përmbarimi në klub, thuhet qartë se nëse nuk paguhet detyrimi prej 6 mijë eurosh ndaj pronarëve të shtëpive, atëherë do të merret masa e bllokimit. Afati është 10-ditëshi i parë i muajit dhjetor, ku klubi duhet të bëjë shlyerjen e këtij borxhi të prapambetur. Në këto kushte, duket se në Vlorë historia përsëritet. Në një kohë që u mendua se klubi kishte rënë në qetësi, duket se problemet po shfaqen sërish dhe telashet e mbartura nga vitet e mëparshme nuk kanë të mbaruar. Në rast se Përmbarimi vepron, atëherë lojtarët do të kenë sërish probleme me pagesat. Eksperienca e viteve të kaluara nuk ka qenë aspak e mirë dhe llogaritë kanë qëndruar të bllokuara për një kohë relativisht të gjatë.
PRONARËT - "Panorama Sport" mëson se pronarët e banesave ku kanë jetuar me qira ishtrajnerët Rubio dhe Gjoka, kanë kontaktuar edhe drejtuesit e klubit të Flamurtarit. Por nga ata kanë marrë përgjigjen se ky është një detyrim që nuk njihet pasi nuk u takon atyre. Të gjendur në këto kushte, pas pritjes për më shumë se pesë vite, pronarët e shtëpive i janë drejtuar Përmbarimit. Ky i fundit tashmë ka dërguar në klub shkresën zyrtare, ku vendos në dijeni klubin se ka afat 30 ditë për pagesën e këtij detyrimi. Nuk dihet nëse nga klubi do të paguhet ky detyrim, po nëse ndodh e kundërta, atëherë klubi do të përballet seriozisht me probleme jo të panjohura.