Luhet në fushë asnjanëse, kënaqet Dedja
I Lushnjës: Duhet ta shfrytëzojmë këtë fakt për rezultat pozitiv
Fundjava që kaloi, ka qenë e ngjeshur për verdhejeshilët. Skuadra e trajnerit Dedja është stërvitur me dy seanca të shtunën dhe të dielën me një seancë. Tekniku shkodran i Lushnjës, Hysen Dedja, ka shfrytëzuar ndërprerjen e kampionatit dhe shpreson për një rezultat pozitiv ndaj Vllaznisë. "E kemi shfrytëzuar këtë periudhë dhe jam i kënaqur për seriozitetin e treguar si nga skuadra, ashtu edhe nga drejtuesit. Jemi përgatitur mirë dhe luajmë ndaj Vllaznisë për rezultatin pozitiv. Do të luajmë në fushë asnjanëse dhe duhet të dimë ta shfrytëzojmë këtë fakt sepse është një plus për ne. Nuk është se e njoh mirë skuadrën e Vllaznisë, por për disa lojtarë aty brenda kam informacion", deklaroi trajneri i lushnjarëve. Ndërkohë, klubi lushnjar, për gazetën "Panorama Sport", ka njoftuar se ditën e hënë do të përcaktohet se ku do të luhet takimi Vllaznia-Lushnja. Me shumë mundësi do të luhet në stadiumin "Kastroti" të Krujës. PAPA - Mesfushori i lushnjarëve, Enriko Papa, deklaroi për gazetën se ekipi verdhejeshil ushqen shumë shpresa për një rezultat pozitiv ndaj Vllaznisë. "Unë mendoj se ndeshja luhet në një moment shumë delikat për të dyja skuadrat. Ndoshta jemi në një pozitë edhe më të vështirë se ajo përpara ndeshjes me Luftëtarin. Duke korrigjuar gabimet dhe duke bërë një ndeshje të mirë shpresojmë te rezultati pozitiv që do t'i jepte shumë kurajë skuadrës për fazën e dytë të kampionatit. E ndiej veten në formë të mirë dhe i motivuar për të lënë gjurmë te Lushnja", tha mesfushori Papa. Alban Alushi