Vllaznia “motivohet” në teatër për... kthesën
Trajneri kërkon të fusë një frymë sa më pozitive në ekip
Vllaznia ka lënë për një moment fushën e lojës apo të stërvitjes duke humbur përqendrimin nga Kategoria Superiore. E gjithë skuadra ose më mirë pjesa më e madhe e saj nuk do ta kenë mendjen te ndeshja e radhës bashkë me trajnerin Ernest Gjoka. Të ftuar nga bashkia Shkodër, skuadra e Vllaznisë bashkë me stafin teknik dhe atë drejtues, ishin të pranishëm në sallë në natën e parë të festivalit të këngës qytetare "Lule Borë" në teatrin "Migjeni". Kuqeblutë janë një skuadër që nuk qëndrojnë vetëm në fushën e lojës apo të stërvitjes, por kanë kohë edhe për të tilla argëtime që mund t'u shërbejnë për të çliruar ngarkesat që kanë, qoftë edhe ato psikologjike. Shpresojmë që këtë herë t'i shërbejë për mirë, sepse edhe sezonin e kaluar Vllaznia shkoi te muzeu kombëtar "Marubi" dhe u njoh me historinë apo hartat në bibliotekën e qytetit, por në fund thuajse asgjë nuk vlejti sepse ekipi vetëm në javën e fundit me Tiranën e siguroi qëndrimin në Superiore. Kësaj here shpresojmë të jenë ndryshe, sepse sporti dhe arti më shumë se larg, janë shumë afër njëra-tjetrës me një emërues të përbashkët, emocion, sakrificë dhe rezultat. Kjo është mbase mënyra më e mirë që stafi ka menduar për të qetësuar skuadrën dhe për të bërë të mundur që të shtohet harmonia dhe qetësia e munguar së fundmi. Ulja e ngarkesës emocionale te futbollistët pritet që të japë frytet e veta, pasi në këtë mënyrë secili futbollist është më i qetë në fushë për zbatimin e detyrave taktike dhe skemave që janë përdorur gjatë stërvitjeve.