Apolonia përgatitet në heshtje për surprizën në kryeqytet

Hysenshahaj: Rëndësi ka që mos dalim të humbur

Panorama Sport (Albania) - - KATEGORIA SUPERIORE -

Luhet java e parafundit në llogarinë e fazës së parë në Kategorinë e Parë dhe "goglat" i kanë rezervuar Apolonisë kundërshtarin më të fortë të kompeticionit. Skuadra e Kashamit do të udhëtojë drejt Tiranës për të matur forcat me bardheblutë kryesues. Duket një takim i mbyllur që në letër me favoritë të padiskutueshëm kryeqytetasit, por fierakët e dëshirojnë fort surprizën. Me indinjatën e tifozërisë mbi supe, Apolonia do të udhëtojë drejt Tiranës për të mos u rikthyer duarbosh në Fier. Këtë e shpreh me pak hezitim e rezervë, por edhe me shpresë, mesfushori Taulant Hysenshahaj. "Pa fjalë të tepërta, Tirana është skuadra më e fortë e gjithë kompeticionit në të dyja grupet. Luan në Kategorinë e Parë, por janë fitues të Kupës së Shqipërisë, dëshmi e forcës së padiskutueshme të kësaj skuadre të madhe. Ne kemi një ekip të ri, që, pavarësisht dëshirës, na mbetet akoma shumë për të bërë që të krijojmë një profil të qartë e të qëndrueshëm. Kjo ndeshje? Nuk ka pse të bëjmë lojëra fjalësh. Thelbi dihet: Tirana është ekip i vështirë (këtë nuk e them unë i pari) edhe kur luan në transfertë, le më në fushën e saj. Objektivi ynë do të jetë të mos humbasim, çka shpresojmë ta realizojmë, pavarësisht shkallës së lartë të vështirësisë", është shprehur për "Panorama Sport", Hysenshahaj, i cili është një nga titullarët e skuadrës. Ndërkohë, pas humbjes me Tomorin javën e shkuar, lojtarët janë duke u përgatitur për ndeshjen ndaj bardhebluve, kokulur dhe me përkushtim. Fatjon Nana

Newspapers in Albanian

Newspapers from Albania

© PressReader. All rights reserved.