Lëv: Më pëlqeu si e ruajtëm qetësinë
Pas barazimit të vendosur në stadiumin e Këlnit ndaj kombëtares franceze, trajneri i gjermanëve Joakim Lëv ka thënë se: "Së pari jam shumë i kënaqur me paraqitjen e skuadrës edhe në miqësoren ndaj Anglisë, gjithashtu dhe në këtë ndaj Francës. Kundërshtarët tanë në këtë përballje kanë pasur lojtarë mjaft të mirë dhe shumë të shpejtë. Problemet që kishim në pjesën e parë kanë qenë më se normale, por ne kemi arritur të ruajmë qetësinë, ndryshe mund ta kishim humbur sfidën. Sa i përket pjesës së dytë, mendoj se kemi luajtur më mirë se në atë të parën, pasi kemi përdorur kundërsulmet mjaft mirë për të kërcënuar kundërshtarët tanë. Edhe në sulm kemi qenë të mirorganizuar, çka ka qenë e dukshme edhe në momentin që kemi shënuar dhe golin e barazimit. Timo Verner është një lojtar, i cili kërkon gjithmonë të depërtojë në mbrojtjen e kundërshtarëve dhe përbën vazhdimisht një rrezik të madh për ta. Gjatë këtij viti kam mbetur i surprizuar me paraqitjen e tij, pasi ka luajtur në mënyrë të shkëlqyeshme dhe për këtë jam shumë i lumtur".