Deshamp: Mund të kishim fituar

Në sfidën miqësore ndaj kombëtares gjermane, Franca arriti të barazonte me rezultatin 2-2 në Këln të Gjermanisë. Menjëherë pas përfundimit të kësaj përballje, trajneri i francezëve, Didier Deshamp, ka folur duke thënë se: "Prisja të fitonim, pasi kemi qenë më pranë rezultatit 3-1 sesa me barazimin 2-2. Kemi pësuar një shpërqendrim, i cili na nxori paksa nga rrjedha e lojës, pas të cilit kemi pësuar edhe golin e parë të barazimit. Jam i lumtur, pasi kemi shfaqur një karakter tepër të fortë në repartin e sulmit, por në fund nuk kemi arritur të godasim sërish kundërshtarët tanë gjermanë. I kishim të gjitha mundësitë për të shënuar edhe më tepër, por fatkeqësisht nuk ia dolëm. Në anën tjetër, Gjermania ka arritur të na bëjë të vuajmë në disa raste, megjithatë ka qenë një përballje miqësore shumë emocionuese dhe është luajtur një futboll tepër i bukur. Jemi shumë pranë me kombëtaren gjermane, edhe pse ata janë përpara nesh. Kjo sfidë do më shërbejë për t'i analizuar edhe më mirë ata për të fituar në takimin e radhës".