Mateus: Ibiseviç, i duhuri për Levandovskin
I futbollit u jep sugjerime kampionëve gjermanë për merkaton e janarit
Eksperti i futbollit gjerman, Lotar Mateus, i ka rekomanduar gjatë ditës së djeshme në median gjermane "Sky Sports", klubit të kampionëve gjermanë, disa opsione mjaft të mira për të fuqizuar skuadrën. Mateus është ndalur më së shumti në zëvendësuesin e bomberit polak, Robert Levandovski, ku sipas të cilit, opsioni më i mirë për ta zëvendësuar në Mynih është pikërisht sulmuesi i skuadrës së Hertës, Vedad Ibiseviç. Në këtë intervistë, Lotar Mateus ka thënë: "Vedad Ibiseviç ka pikërisht të gjitha cilësitë që do ta ndihmonin repartin e sulmit në skuadrën e Bajernit. Ai e njeh një kompeticion si Bundesliga, pasi ka luajtur atje për vite me radhë dhe ka arritur rezultate të shkëlqyera, si dhe një formë të jashtëzakonshme. Në moshën 33-vjeçare ai është pikërisht në fazën ku nuk do t'i duhet të aktivizohet patjetër në çdo ndeshje, por nga ana tjetër, është një lojtar, i cili do të shënonte shumë gola me fanellën e kampionëve gjermanë dhe do të përshtatej shumë mirë me trajnerin Jup Hejnkes dhe sistemit të preferuar prej tij, ai 4-2-3-1". Madje edhe për sulmuesin e Hertës, Ibiseviç, transferimi te skuadra e Bajernit do të ishte një zgjedhje mjaft e mirë në prag të përfundimit të karrierës së tij. Gjithashtu, ai do të ishte një mundësi shumë e vlefshme e cila do ta ndihmonte skuadrën e kampionëve gjermanë për të rrëmbyer edhe më shumë tituj. Më tej, Lotar Mateus tha: "Për klubin e Bajernit, blerja e Vedad Ibiseviç do të ishte një zgjidhje e drejtë si nga aspekti ekonomik, ashtu edhe nga ai sportiv". Eksperti i futbollit gjerman ka folur edhe mbi emrat, të cilët mund të zëvendësojnë Arjen Roben dhe Frank Riberinë te Bajerni duke shtuar se: "Nëse Roben dhe Riberi do jenë në formë të mirë, ata do e ndihmojnë skuadrën për edhe një tjetër vit. Në të kundërt, klubi i kampionëve gjermanë duhet të hidhet në sulm menjëherë për Julian Drakslerin e PSG-së dhe Kristian Pulisiç të Dortmundit. Të dy këta lojtarë do të arrinin të zëvendësonin më së miri hapësirën që do të linte dyshja Roben-Riberi".