Anglia ndal Nejmarin, s’ka gola në “Wembley”
Holanda tre gola Rumanisë, Portugalia nuk fiton pa CR7
Nuk ishte një nga përballjet më të paharrueshme, por Anglia mund të marrë zemër nga barazimi pa gola kundër Brazilit. "Tre Luanët" morën një tjetër barazim 0-0 pas atij ndaj Gjermanisë në "Wembley" (dy skuadrave të para në renditjen e FIFA-s) dhe këtë herë skuadra që nuk arriti dot t'u shënonte ishte ajo e Nejmarit me shokë. Skuadra e Garet Sauthgejtit qëndroi për pjesën më të madhe të ndeshjes në mbrojtje dhe falë të qenit solid në prapavijë, ata arritën barazimin e parë pa gola mes këtyre dy kombëtareve në 40 vite. Nejmar bëri më të mirën për ta ndezur ndeshjen, por pavarësisht se "seleçao" dominoi për pjesën më të madhe të ndeshjes, ata nuk arritën dot të thyenin një mbrojtje të vendosur mirë, veçanërisht me Xho Gomezin, që shkëlqeu në zemër të saj në sistemin 3-5-2. Sauthgejt i dha shansin e debutimit atij dhe shokut të skuadrës Dominik Solanke, i cili hyri nga stoli në pjesën e dytë. Por një skuadër pa Kejnin dhe Dele Alin ishte e kërcënueshme në Londër. Fernandinjo dhe Uillian patën dy raste në pjesën e dytë, ndërsa shansi më i mirë për të shënuar për anglezët kaloi nga Solanke në fund. Por kaq nuk mjaftoi për të zhbllokuar rezultatin.
ARGJENTINA - Hap fals për "Seleçion", që tregon se nuk mund të bëjë ende pa Mesin. Pa "Pleshtin" e rikthyer në Barcelonë për disa ditë më shumë pushimi, Argjentina pësoi një humbje të rëndë në miqësoren e dytë në tokën ruse, pas suksesit në Moskë ndaj Rusisë të shtunën. Protagoniste e një pjese të parë të mirë, të mbyllur në avantazh (Banega 27' dhe Aguero 36'), në Krasnodar, bardhekaltrit pësuan përmbysjen e Nigerisë, duke kapitulluar nga goditjet e Idou dhe Iuobit (sulmuesi i Arsenalit ishte edhe autor i një dopiete). Provë zhgënjyese për Dibalën, i zëvendësuar në minutën e 63të. Por ai që shqetëson është Aguero, i cili u zëvendësua në minutën e 46-të, pasi i ra të fikët në dhomën e zhveshjes.
SPANJA - Viti 2017 mbyllet me një festival golash për Spanjën në Rusi. Barazim spektakolar 3-3 në stadiumin "Arena e Shën Pjetërburgut". Golat e Hordi Albës dhe Serxho Ramosit dërguan iberikët në avantazh të dyfishtë, duke dhënë përshtypjen e një shëtitjeje në këtë miqësore. Por Rusia luftoi dhe ekuilibroi gjithçka me dy golat e Smolovit dhe Aleksei Mirançuk. Një penallti e dytë e Ramosit u riktheu avantazhin ish-kampionëve të botës, por organizatorët e Botërorit iu përgjigjën me një goditje spektakolare të Smolovit.
HOLANDA - "Tulipanët", një tjetër kombëtare që do ta shohë Botërorin nga TV, arritën një fitore të lehtë 3-0 në
Bukuresht falë golave të Memfis Depajit, Rajan Babelit dhe Luk de Jongut. Rumania dhe Holanda luajtën një pjesë të parë me rrjeta të paprekura, por menjëherë pas kthimit nga dhomat e zhveshjes, Memfis Depaj zhbllokoi rezultatin për miqtë. Në minutën e 56-të, ishlojtari i Liverpulit, Rajan Babel,
dyfishoi përpara se Ljuk De Jong të vuloste gjithçka 9 minuta nga fundi.
PORTUGALIA - Kampionët e Europës u ndalën në një barazim 1-1 ndaj SHBA-së. Pa yjet në fushë, amerikanët kaluan në avantazh me MekKenin në 21', por iu përgjigj Antunjes 10 minuta më vonë.