"Kamara toleroi te goli, deri në fund s’marrim penallti"

Flamurtari arriti të barazonte në shtëpi ndaj Skënderbeut kryesues, por edhe në këtë ndeshje nuk munguan rezervat për gjyqtarët. Në një prononcim për "Super Sport" pas ndeshjes, trajneri Shpëtim Duro deklaroi se skuadra e tij ndihet e vjedhur dhe në qoftë se arbitrimi do të ishte korrekt, duhet të kishin marrë më shumë nga sfida.

Rezultati dhe momentet e kontestuara "Komplimente skuadrës për atë që ka dhënë. Kishim përballë Skënderbeun, që dihet forca e tyre. Sot (dje) e meritonim patjetër fitoren. Kemi shënuar, kemi mbyllur hapësirat e kundërshtarit. Kam shumë rezerva për gjykimin. Në qoftë se goli i dytë ka qenë i rregullt, them se e kemi fituar takimin. ( Trajneri shikon pamjet filmike në televizion dhe më pas vijon.) Është gol i rregullt, as që nuk diskutohet. 11- metërsh nuk besoj se mund të marrim deri në fund të kampionatit. Çfarë të bëjë skuadra më shumë?! Na anulohen gola të rregullt me dy skuadrat më të forta të kampionatit, Skënderbeu dhe Kukës. As penallti nuk na japin. Çfarë të bëjmë ne?! Në qoftë se gjykimi do ishte korrekt, them se duhet të kishim marrë më shumë. Nuk është sjellje e mirë kjo, edhe për tifozët që e ndjekin skuadrën, edhe për lojtarët." Barazimet me Kukësin dhe Skënderbeun

"Barazimet me dy skuadrat më të mira të kampionatit janë të pranueshme. Si u zhvilluan të dyja ndeshjet, kam mendimin se skuadra jonë ka merituar më shumë. S'kemi shpresa të marrim ndonjëherë 11-metërsha." Gabimet në ndeshjen ndaj Skënderbeut… "Përgjegjësia e parë ishte te krosimi i golit nga Vangjeli, në të cilin toleroi Kamara pasi po i thosha që duhet të mos lejojë krosimin e tij nga ai kënd. Ne duhet ta kishim zgjidhur më shpejt situatën. Gabime, normalisht që ka, siç ishte në momentin e golit".

Sa e vështirë është të mundësh një Skënderbe me mungesa?

"Jashanica dhe Lilaj janë lojtarë me vlera, por trajneri kishte alternativa të forta si Aliti dhe Osmani për t'i zëvendësuar. Nuk është mungesë ai lojtari çek. Nuk diskutohen mungesat te Skënderbeu. Edhe ne nuk kishim Veliun dhe Pollozhanin. Ky i fundit është lojtar me vlera, por jam shumë i kënaqur me skuadrën. Duhej të ishim më të vëmendshëm në momentin e golit. Por në dy ndeshjet e fundit jam i kënaqur, duke qenë se një skuadër e re përballon ekipe si Skënderbeu e Kukësi. I jap nota shumë pozitive skuadrës", ka deklaruar Duro.