Milinkoviç: Mbaj përgjegjësi, humbëm shumë raste

Trajneri i skuadrës së Kukësit, Mladen Milinkoviç, u shpreh se skuadra e tij duhet të ishte treguar më e saktë në finalizimin e rasteve që i janë dhënë për shënim. "Loja ishte e mirë për tifozët, por nuk ishte e mirë për trajnerët. Besoj se pjesa e parë ishte më e bukur. Të dy ekipet krijuan raste dhe shënuan nga një gol. Në pjesën e dytë në 15 minutat e para nuk u futëm mirë në lojë. Ishim me fat që barazuam. Në pjesën e parë humbëm shumë raste dhe duhet ta kishim mbyllur ndeshjen. Ashtu si në ndeshjen me Flamurtarin, edhe sot (dje) kishim dy raste të pastra me Ethemin dhe Bakajn", tha trajneri që sqaroi edhe aktivizimin e Alijevit dhe problemet në mbrojtje. "Alijev u fut pasi ishim në disavantazh. Deshëm të luanim me dy pyka dhe të luanim me krosime nga krahët. Nuk e bëmë këtë gjë. U munduam ta qarkullonim topin dhe të dilnim në krah, por nuk ia arritëm. Mbrojta bëhet nga i gjithë ekipi. Në golin e parë nuk e bllokuam dot Plakun në kohë. Në golin e dytë, Ethemi nuk mbylli dot dhe e la Plakun të shënojë", tha trajneri në "SuperSport". Ndërsa për "TVSH" ai foli edhe për Allën dhe rrezikun e shkarkimit. "Kur ekipi nuk ecën, atëherë përgjegjësinë e ka trajneri, por do të shoh. Ndërsa për Allën nuk ka asnjë dënim", ka thënë Milinkoviç. Megjithatë, trajneri serb ka lënë në stol qendërmbrojtësin që shihej si një nga lojtarët e pazëvendësueshëm në skuadër. Kukësi vazhdon të çalojë në mbrojtje, edhe pse ishin kthyer Hallaçi e Shameti, por të dy nuk kanë qenë në formën e tyre më të mirë.