Humbja tronditi Besëlidhjen, në Lezhë kërkojnë kthesën e madhe
Lezhjanët e Besëlidhjes po përgatiten në drejtimin e trajnerit Gledis Lani për ndeshjen e radhës ndaj Korabit, që do të luhet të shtunën në Lezhë. Ndonëse si fillim u duke se humbja ndaj Kastriotit do të kapërdihej nga stafi, por kjo konkludoi ndryshe, ndonëse me vonesë që çoi në largimin e trajnerit Anteu Pepaj dhe heqjen e shiritit të kapitenit portierit Elson Demit dhe kalimin e tij si portier i dytë. Besëlidhja, si pretendente kryesore që synon ngjitjen në Superiore, i duhet që t'i afrohet sa më shumë kreut dhe më pas ta marrë atë, por deri aty i duhet shumë punë dhe sa më pak gabime. Mbrojtësi Niku Vocaj, humbjen në Krujë e quan aksidentale pasi loja duhej të mbyllej në barazim, sepse skuadrat ishin të të njëjtit nivel: "Ndonëse ishim përgatitur maksimalisht për të marrë pikë në Krujë përballë Kastriotit, 16 minutat e para të takimit mjaftuan që ne ta humbnim atë ndeshje dhe kjo nuk erdhi nga niveli i lojës së të dyja skuadrave, por më shumë nga fati. Tashmë jemi të detyruar që ta pranojmë realitetin dhe ato gabime duhet t'i analizojmë dhe t'i minimizojmë sa më shumë që të jetë e mundur, që të mos na ndodhë në sfidat e ardhshme. Ne kemi një objektiv, që është kapja e kreut, dhe nuk është vonë. Tashmë gjithçka e kemi të përqendruar te sfida e radhës që do ta luajmë në shtëpi ndaj Korabit, një ndeshje që po e vlerësojmë maksimalisht pasi na duhet patjetër fitorja, që do të ishte edhe autokritika jonë praktike për atë çka ne bëmë në Krujë", e mbylli bisedën mbrojtësi lezhjan i Besëlidhjes, Niku Vocaj. Preng Gjikola