Kartonë të kuq dhe protesta, derbi ndez kryeqytetin italian
32 përjashtime në 22 vite
Kujdes me nervozizmin, është ky refreni i përvitshëm i derbit mes Romës dhe Lacios. Paralajmërimi jepet me përpikëri dhe po me aq përpikëri nuk respektohet. Duke filluar që nga sezoni 1994/95 (që kur fitorja vlen tri pikë), sfida mes dy kryeqytetaseve, mes 22 kampionateve dhe 46 ndeshjeve, ka prodhuar 32 kartonë të kuq, ku romanistët janë përjashtuar 13 herë, ndërsa lacialët kanë rezultuar disi më nervozë me plot 19 dalje të parakohshme nga fusha e blertë. HISTORIKE - Tension, ndërhyrje të ashpra, goditje të ndaluara dhe shumë të tjera; kronika e dy dekadave të fundit mbi derbin ngjason me një boletin lufte, që përveç rasteve të shumta për moviolë, i ka dhënë jetë edhe polemikave që kanë vijuar për javë të tëra. Sikur të mos mjaftonin të gjithë këta përbërës, sfida e nesërme ka edhe më shumë stimuj në valle. Prej 22 viteve të marra si bazë, kjo sfidë nuk ka pasur kurrë 55 pikë të ndara mes dy skuadrave të Romës, që mund të ishin edhe më shumë nëse të dyja të mos kishin nga një ndeshje mangët. Derbi mund të vendosë edhe cila do të jetë skuadra që do të ketë vendin e nderit, pas Juventusit dhe Napolit që duken si të paarritshme. TEKNOLOGJI - Një tjetër herë
e parë për këtë derbi, do të jetë edhe teknologjia. Lojtarët e të dy palëve ngaherë kanë qenë të monitoruar, por tashmë, me ndërhyrjen e VAR, mundësia për të kaluar pa u vënë re reduktohet në minimum. Në përpjekje për të nënvijëzuar tensionin që përshkon derbin roman, mjafton ta krahasojmë
me atë të qyteteve të tjera ku vihet re një përgjysmim i kartonëve. 16 kartonë të kuq janë koleksionuar në 22 vitet e fundit në derbin e Torino, 15 në atë të Milanos dhe vetëm 9 në atë të Xhenovës. Edhe një ndeshje e ashpër e dy dekadave të fundit si Juve-Roma, nuk e ka kapërcyer
kufizimin e 30 përjashtimeve, çka e kthen derbin roman në ndeshjen më të "përgjakshme" të Serisë A me Lacion, që ka për detyrë të bëjë paqeruajtësen duke qenë se janë formacioni më pak i njollosur i kampionatit italian, me vetëm 10 kartonë të verdhë në 11 sfida të luajtura.