Inter-Juventus, duel i ashpër për Vaskezin

Bardhezinjtë e kanë joshur edhe më parë, “Suning” i ka vendosur “frenat” merkatos, por...

Juventusi e Interi janë gati për "luftë". Jo në kampi onat, së paku jo akoma (për "derbin e Italisë" duhet pritur 9 dhjetori), por përflitet për një duel merkatoje. Emri i pëlqyer nga drejtuesit e dy klubeve është Franko Vaskez dhe Piero Auzilio e Xhiuzepe Marota janë gati të rikthejnë fantazistin (i aftë mbi të gjitha pas krahëve të sulmuesve, por mund të pozicionohet edhe si sulmues apo mesfushor krahu) në Serinë A pas eksperiencës te Palermo.

DIBALA "ALEAT" - Në të kaluarën, Franko ka qenë në bisedime me klube të mëdha të Italisë (mes tyre edhe "Zonjën e Vjetër"), por në fund zgjodhi "La Liga"-n. Për momentin nuk ka ende tratativa të hapura, këto janë zërat që përfliten në Spanjë, kampionat ku Vaskez militon aktualisht (në radhët e Sevijes), me të përditshmen "El Mudo" që shpjegon se italo- argjentinasi pëlqehet si nga bardhezinjtë, po ashtu edhe nga zikaltrit. Dhe atij vetë nuk duket të mos i pëlqejë si ide. Ndër të tjera, në Torino do gjente sërish një tjetër argjentinas, një njohje të vjetër që prej kohës që kur luante në Sicili me fanellën rozë: "Te Sevija aktualisht jam mirë, është një klub i madh dhe luaj në Ligën e Kampionëve. Rikthimi në kampionatin italian? Nuk i dihet...", ishte deklarata për shtypin spanjoll, ndërsa

për "Tuttosport", gjatë një interviste të disa kohëve më parë, 28- vjeçari pati thënë: "Do më pëlqente të luaja sërish përkrah me Dibalën. Paulon e shoh si të ardhmen e Juves, mund të kthehet në simbolin e bardhezinjve: ndihet

i lumtur dhe i rëndësishëm".

ZIKALTRIT ME "FRENA" NË MERKATO, POR... - Bardhezinjtë mendohet të jenë të vendosur të bëjnë një përpjekje që në merkaton e janarit, e këtu do kishin një avantazh ndaj rivalëve të përjetshëm: "Suning" (investitorët e Interit), në fakt, e kanë bërë të qartë vendimin se në merkaton e radhës nuk do të ketë shpenzime marramendëse, përjashto mundësinë e autofinancimit (blihet vetëm nëse ndërtohet një buxhet me lëvizjet në dalje) dhe me shumë mundësi do synohet argjentinasi tjetër, Havier Pastore, pas idesë së fundit të një shkëmbimi me Zhoao Marion e pakënaqur me minutat e pakta në Milano. Pra, bardhezinjtë duket të nisen me një avantazh (sado të vogël), me "Suning" të "prangosur" nga rregullat e rrepta të "Fair Play Financiar" (së paku deri qershorin e ardhshëm), por Valter Sabatini (koordinatori teknik i zikaltërve dhe i Jiangsu) u kthye me lajme të mira nga udhëtimi i fundit në Nankin. Dhe kurrë nuk duhet nënvlerësuar fuqia e kinezëve...