Arsenal-Totenhem, Premier Liga rindez “motorët”
Dy Mançesterët duel në distancë, në fushë edhe Çelsi
Pas pauzës së kombëtareve, miqësor eve dhe "play-off"eve botërore që tashmë kanë plotësuar kornizën me 32 skuadrat që do të marrin pjesë në Kupën e Botës, "Rusi 2018", Premier Liga do të rikthehet sot që të ndezë "motorët" me tifozët dhe sportdashësit anglezë dhe të futbollit ishullorë, gati për të përjetuar emocionet që u kanë munguar. ARSENAL-TOTENHEM
Java e 12-të do të startojë sot në orën 13:30, me një sfidë elektrizuese. Përballë do të jenë Arsenali dhe Totenhemi, një derbi londinez, një nga të shumtit, por që vë përballë dy tifozeritë që urrejnë më shumë njëratjetrën. Për "Topçinjtë" do të jetë një ndeshje shumë e ndjerë, sepse ata kanë dalë të mposhtur herën e fundit ndaj "Spërsave". Ai që do të bëjë vizitë në "Emirates" do të jetë Totenhemi i Herri Kejnit, me këtë të fundit që do të kërkojë të vendosë rekord. Në pesë përballjet e fundit, ai u ka shënuar gjithmonë Arsenalit për një total prej 6 golash. Por, nëse e bën edhe sot, do të jetë i vetmi që në historinë e këtij derbi që arrin të realizojë në 6 ndeshje radhazi. LEIÇESTER-MAN.SITI
"Dhelprat" do të presin në strofkën e tyre skuadrën dominuese të Premier Ligës. Tashmë, magjia e titullit kampion është shuar me kohë, prandaj objektivi i Leiçesterit do të jetë që të mos dalë i mundur përballë "makinës" perfekte të ndërtuar sivjet nga Pep Guardiola.
Ndoshta, të zotët e shtëpisë, përveç pikëve për të mbajtur sa më të sigurt renditjen e tyre, kanë edhe detyrimin për të mbajtur gjallë edhe kampionatin sepse Siti nuk njeh kundërshtarë sivjet dhe ndoshta një ndalesë e "qytetarëve" sot do t'i jepte më shumë gjallëri edhe Premier Ligës, e cila sheh Sitin 8 pikë përpara Junajtid. MAN.JUNAJTID-NJUKASËLL
Duke mbetur pikërisht te Mançesteri, këtë herë ai i Zhoze Murinjos, ata do të presin Njukasëllin e Rafael Benitezit. Edhe pse distanca nga kreu është thelluar, sot "Djajtë e kuq" kanë marrë disa lajme shumë të mira, pasi kanë rikuperuar tre armë të rëndësishme, me të cilat mund të tentojnë të ndryshojnë fatin e kampionatit. Zlatan Ibrahimoviç ka bërë mrekullinë duke shpejtuar rikthimin e tij dhe sot do të jetë në stol. Edhe mesfushori Pol Pogba është gati, ashtu sikurse mbrojtësi i majtë argjentinas, Markos Roho. Në fushë nga të mëdhatë do të jetë i impenjuar edhe Çelsi, i cili në transfertën ndaj Uest Bromuiç do të kërkojë të fitojë, për të mos dalë nga zona Champions.