Bashkia e Kamzës: Na vodhi arbitri

"Arbitri na vodhi fitoren e merituar, ishte i njëjti që gjykoi edhe në Kukës. Kambana bie për FSHF- në". Kështu niste dje deklarata për shtyp e Bashkisë së Kamzës, që bashkë me presidentin e klubit, Naim Qarri, menaxhojnë skuadrën. "I njëjti arbitër në të dyja ndeshjet është i qëllimshëm apo rastësi!? Edhe në ndeshjen me Flamurtarin, arbitri i mohoi Kamzës golin e rregullt dhe një penallti të pathënë. Këtë sezon Kamza po luan futboll të bukur, por në disa ndeshje vijojnë që arbritrat ta dënojnë padrejtësisht dhe t'i mohojnë fitoret. Rastet janë konkrete, si gjykimi në përballjen dy herë me Kukësin, ashtu edhe kundër Flamurtarit të Vlorës. Në ndeshjen e fundit, Kamza e dominoi totalisht Kukësin, por arbitri Kridens Meta i mohoi fitoren e merituar. Goli i parë i Kukësit ishte faull i dukshëm ndaj portierit të Kamzës, Argent Halilaj, nga sulmuesi i Kukësit, Kale, por arbitri, në vend që ta anulonte, e akordoi si gol të rregullt. Është i njëjti arbitër që ka gjykuar edhe ndeshjen e parë të fazës së parë në Kukës, ku e ka favorizuar qartë ekipin vendës", thuhej fillimisht në deklaratën për shtyp të Bashkisë Kamzë. Më pas citohej se klubi duhet të ishte tani në vend të dytë. "Në total Kamzës i janë mohuar 6 pikë të sigurta. Me pikët e mohuara, Kamza do të renditej në vendin e dytë. Këto raste prekin drejtpërdrejt FSHF-në, pasi gjykimi ka qenë i kontestuar në disa ndeshje dhe po bëhen shumë klube që ngrenë zërin këtë herë për menaxhim aspak serioz të garës dhe favorizim të disa ekipeve", mbyllet reagimi i bashkisë që drejtohet nga Xhelal Mziu. A.Dushku