Bashkohen tifozët e Superiores: Të ikin ata që vendosin gjyqtarët
Klubet mbështesin nismën e ultrasve që përfaqësojnë pesë skuadra
Rastet e fundit në Kategorinë Superiore me gabimet e arbitrave, që kulmuan me ndeshjet e javës së 10-të, luajtur të mërkurën dhe të enjten, kanë krijuar një situatë mosbesimi për vazhdimësinë. Stadiumet po boshatisen javë pas jave dhe duket se për tifozët është mbushur "kupa". Edhe ata mendojnë se me gabimet në vazhdimësi të gjyqtarëve, imazhi i kampionatit vetëm ulet dhe për më tepër kriza e besimit për ndeshjet e Superiores do të vijojë të thellohet. Të nxitur edhe nga deklaratat e klubeve, pesë përfaqësi të tifozërive të Partizanit, Flamurtarit, Vllaznisë, Luftëtarit, Lushnjës dhe Kamzës, kanë dalë dje me një letër të hapur drejtuar FSHF- së, FIFA- s dhe UEFA- s. LETËR E HAPUR
"Ne tifozët e stadiumeve shqiptare u drejtohemi klubeve tona, përkatësisht FK Partizani, Flamurtari F.C, KF Vllaznia, FK Lushnja, KF Luftëtari dhe presim dhe solidarizimin e tifozëve të klubeve të tjera nëse ata e mendojnë të arsyeshme. Klubet tona, si anëtarë të federatës me të drejta të barabarta, kanë pasur mundësinë për të vënë në dukje se niveli i gjykimit nga arbitrat dhe organe të ndryshme vendimmarrëse ka qenë jo profesional, mbi të gjitha, askush nuk i ka marrë parasysh këto ankesa. Atëherë ne si tifozë kemi vendosur të bashkojmë forcat dhe kërkojmë nga klubet tona të bëjnë të njëjtën gjë. Në faqet e klubeve t'i bëhet një kërkese publike Federatës Shqiptare të Futbollit për herë të fundit dhe më pas nëse ajo nuk reagon, t'i drejtohet një letër e hapur UEFAs dhe FIFA-s për të ndërhyre fillimisht në këtë pikë:
1. Largimi përfundimtar i këtyre personave të punësuar nga FSHF-ja, përgjegjës për arbitrimin dhe sipas mendimit tonë të dështuar totalisht në organizim, duke pasur arbitrim poshtë nivelit të futbollit tonë, i cili ka përparuar, si: Petrit Brahja, Tahir Kastrati, Arian Mali, Prek Pjetrushi, Plarent Kotherja dhe Bujar Pregja.
2. Të kërkohet nga UEFA dhe FIFA analizë e arbitrave të FIFA- s, të cilët kur arbitrojnë në Shqipëri, përfaqësojnë dhe këto organe dhe i kanë denigruar jashtëmase ato me vendimmarrjet e tyre, të na ndihmojnë për të shpëtuar arbitrimin e vendit tonë nga një shkatërrim i sigurt.
Të dërgohen 4 drejtues të huaj nga UEFA e FIFA dhe të paguhen nga klubet shqiptare. Për dy vjet këta persona të bëjnë punën e disenjatorit dhe vlerësimit të arbitrave, fillimisht të Superligës. Shpresojmë që klubeve tona dhe ne të gjithëve bashkë të na pranohet kërkesa dhe të realizohet një ndryshim thelbësor, i cili do të frenojë largimin tonë nga shkallët e stadiumeve në mënyrë arrogante. Ne të kundërt ne do t'i përgjigjemi arrogancës me armën e çdo tifozi në botë, me dhunë dhe shkatërrim të ndeshjes. Nuk do të lejojmë të na vidhni futbollin, ai është i joni dhe ne jemi të bashkuar".