Sot derbi, Strakosha: Dua të bëhem më i miri në Itali
"Babai është heroi im, keqardhje për Bufonin"
I mërzitur për Bufonin, por i karikuar në maksimum për ndeshjen me Romën. Thomas Strakosha tregon emocionet përpara këtij dueli të rëndësishëm, por nuk vendos të vërë bast për fitoren e Lacios. Portieri i Kombëtares shqiptare thotë se kjo është një sfidë mes të barabartëve, ndërsa i vë vetes objektivin për të qenë portieri më i mirë i kampionatit.
Thomas, cilët kanë qenë "heronjtë" tuaj në fëmijëri?
Si modele për të ndjekur kam pasur gjithmonë Bufonin dhe babanë tim. Ky i fundit ishte dhe vazhdon të jetë heroi im. Ishte shumë e vështirë për mua që ta shihja duke lotuar për diçka që po e priste e gjithë Italia. Ishte një moment i keq edhe për mua, sepse Xhixhi meritonte një fund ndryshe me kombëtaren. Nuk i kam parë kurrë Imobilen dhe Parolon në kaq shumë vështirësi, por e kuptoj peshën që rëndon tek ta.
E patë ndeshjen e Italisë me Suedinë?
Të gjithë lojtarët dhanë maksimumin. E pashë ndeshjen dhe Italisë i mungoi pak fati. Megjithatë, shpresoj që Parolo dhe Imobile të gjejnë
forcën për të qenë gati për derbin. Besoj se do të jenë, sepse janë profesionistë të vërtetë.
Çfarë raporti keni me trajnerin Inzagi?
I detyrohem shumë trajnerit Inzagi, i cili ka besuar tek unë.
Falë tij jam duke shprehur vlerat e mia në fushën e lojës. Por dua të falënderoj edhe drejtuesit. Inzagi është nga të paktët trajnerë që të motivon dhe që bën çdo lojtar të shkëlqejë. Atë e respektojnë të gjithë, ne
lojtarët, magazinierët, fizioterapistët.
Si po e prisni derbin me Romën?
Është një ndeshje, të cilën tifozët e ndiejnë shumë. Këto sfida të japim më shumë stimuj, të ndihmojnë të fitosh besimin për të ardhmen, prandaj janë të rëndësishme. Kush rrezikon më shumë? Të dy ekipet. Për ne është e rëndësishme edhe për klasifikimin. Të dyja skuadrat do të japin më shumë sesa maksimumi në fushën e lojës. Është Lacio favorite për këtë
ndeshje?
Jo. Jemi 50% me 50%. Nuk besoj që do të ketë favoritë në këtë ndeshje, pasi ka dy ekipe të forta, tifozë të mrekullueshëm. Ne e dimë që jemi të fortë, por nuk duhet të flasim për objektiva. Kjo gjë na ndihmon të jemi më të qetë.
Cili është objektivi juaj? Do të jem shumë i lumtur nëse arrijmë të jemi mes 4 ekipeve të para të kampionatit. Objektivi im personal është që të jem një nga portierët më të mirë të kampionatit italian.