Ramos-CR7, Zidan ul “gjakrat”
"Po flasim për dy kampionë që do të na udhëheqin ndaj Atletikos, Nejmar i mirëpritur"
Pauza e kombëtareve, disa lojtarë të freskët si Kristiano Ronaldo dhe Benzema që nuk kanë luajtur me kombëtaret e tyre, mund të jenë çelësi që Reali i Madridit të nisë të bëjë kthesën e vërtetë në kampionat. Dhe sfida derbi kundër Atletikos në "Wanda Metropolitan" është ndeshjA e duhur për t'u kundërpërgjigjur fort dhe për të treguar se askush në skuadrën e tij nuk është dorëzuar në kampionat. Trajneri Zinedin Zidan nuk nguron që ta bëjë të qartë këtë edhe përpara gazetarëve, në konferencën për shtyp. "Derbi është gjithmonë një ndeshje e rëndësishme dhe shpesh një fitore aty do të të japë atë shkëndijë që duhet për të nisur një sprint të rëndësishëm. Fatkeqësisht, nga kombëtaret kemi humbur edhe ndonjë lojtar të rëndësishëm për dëmtim, por disa të tjerë kanë pushuar dhe pres shumë nga Ronaldo e Benzema. Edhe Modriç e Karvahal janë gati dhe në formë. Gradualisht do t'i rikuperojmë të gjithë, por tani duhet të mendojmë vetëm për Atletikon. Grupin e shoh të qetë dhe të motivuar, prandaj kam besim se do të bëjmë një ndeshje të madhe". Edhe pse francezi mundohet të garantojë qetësi, në orët e fundit është folur për një tension mes mbrojtësit dhe njëkohësisht kapitenit Serxho Ramos me
yllin e skuadrës, Kristiano Ronaldo. "Po flasim për dy legjenda të Realit, lojtarë të respektuar. Serxho është i zgjuar dhe mund të them se çdo gjë që ai dëshiron, është që Ronaldo të vazhdojë me ne. Këta janë dy kampionë, dy shtylla të rëndësishme të skuadrës sonë,
prandaj nuk mendoj kurrsesi se ka diçka mes tyre. Përkundrazi, ata do të na udhëheqin përballë Atletikos". Ndërkohë, një tjetër spekulim lidhet edhe me një afrim të mundshëm të Nejmarit, ish-slmuesit të Barcelonës, që duket se në Paris do të bëjë vetëm "tranzitin". "Nuk
dua të komentoj të tilla gjëra. Ai është një lojtar i madh dhe te Reali lojtarët e kalibrit të tij janë të mirëpritur. Gjithsesi, unë di të them se lojtarët më të fortë në botë i kam unë në grup dhe për momentin më mjaftojnë", përfundoi trajneri i Realit, Zinedin Zidan.