Burreli drejt rënies, tifozët kërkojnë largimin e trajnerit
Ekipi i Burrelit, i drejtuar nga tekniku Shahin Berberi, është mundur sërish në fushën e vet. Matjanët janë gjunjëzuar nga Egnatia me rezultatin 1-0 dhe pas tetë javësh, ekipi renditet në vendin e fundit me vetëm tri pikë, duke mos arritur asnjë fitore dhe pësuar pesë humbje.
Ndeshja - Ka mjaftuar një gol me penallti që Egnatia të marrë tri pikë të vlefshme në transfertë. Gjithsesi, miqtë e nisin lojën me ofensiva, ku në minutën e shtatë është Karaj që mund të shënonte. Katër minuta më vonë është Gjoka, i cili vë në vështirësi portierin matjan Hila. Vendësit tentojnë me Lamptejn në minutën e 17të, por gjuajtja nuk përbën rrezik për miqtë. Dy minuta më vonë, matjanët pretendojnë një penallti për prekje të topit me dorë nga mbrojtja rrogozhinase, por gjyqtari kryesor vendos vijimin e lojës. Në minutën e 40-të ka një prekje e topit me dorë nga mbrojtësi Ujka, bën që të akordohet penallti për miqtë. Godet Nako dhe portieri Hila arrin ta prekë topin, por jo ta nxjerrë jashtë. Në pjesën e dytë, vendësit janë më agresivë në lojë, duke tentuar me çdo kusht barazimin e shifrave, edhe pse nuk ia arritën. Në minutën e 55të, Ogbejesi ishte pranë portës mike, por nuk mundi të finalizonte aksionin. Miqtë kundërpërgjigjen me Dostin, i cili, edhe pse i vetëm me portierin Hila, nuk arrin të dyfishojë rezultatin. Matjanët hidhen herë pas here në sulm, ndërsa miqtë provojnë kundërsulmet, por asnjëri nga ekipet nuk gjen rrjetën në këtë pjesë. Rasti më ideal i vendësve ishte ai i Mallunxës në minutat e fundit, pasi ndodhej fare pranë portës mike, por gjuajtja e tij ishte jashtë kuadratit. Kjo humbje nuk është pritur mirë nga tifozëria matjane, e cila pas 8 ndeshjesh dënim, ishte rikthyer në shkallët e stadiumit. Ata duartrokitën ekipin mik në shenjë revolte ndaj skuadrës matjane. Njëzëri tifozët kërkuan largimin e trajnerit Shahin Berberi. Ky i fundit si në disa ndeshje të tjera në shtëpi, nuk pranoi të prononcohet për median.
Gjoni - Ndërsa trajneri i Egnatias, Vladimir Gjoni, vlerësoi lojën e të tijve: "Ishte një ndeshje, të cilën ne e kishim vlerësuar maksimalisht, duke e ditur që do të luajmë në Burrel. Dua të them që më vjen keq që Burreli ndodhet në këtë gjendje, por ne jemi profesionistë dhe si të tillë, do të luftonim për vete. Ambienti ishte mjaft i këndshëm me një tifozëri, e cila të elektrizon. Djemtë tanë realizuan më së miri detyrat e dhëna".