Krerët, të nervozuar me Montelën

Përpara sfidës me Napolin, Masimiliano Mirabeli ishte shprehur besimplotë për takimin e së shtunës, duke deklaruar se Milani kishte një tjetër marsh, por rezultati që pasoi deklaratën e tij e la shumë të zhgënjyer. Sipas së përditshmes italiane "La Gazzetta dello Sport", drejtori sportiv kuqezi ka qenë shumë i acaruar, jo vetëm për shkak të disfatës, por edhe për rreshtimin taktik të skuadrës. Për Mirabelin jo vetëm si drejtues, por edhe si ish-futbollist është e pamendueshme që sulmuesi të rreshtohet në prapavijë si në rastin e Borinit dhe kjo ka qenë një ndër arsyet që ka bërë që ai të largohet i acaruar nga stadiumi "San Paolo". Montela nuk duket në rrezik për momentin, por pozicioni i tij ka nisur sërish të lëkundet. Paraditen e djeshme me skuadrën pushim duket se drejtuesit kuqezi kanë pasur një takim midis tyre, ku kanë analizuar zgjedhjet e diskutueshme të kreut të pankinës së Milanit. Përveç pozicionit të Borinit, ka edhe pikëpyetje mbi rolin e Bonaventurës (i izoluar në krah) dhe atë të Lokatelit. Ndoshta në nivel statistikash, kuqezinjtë vërtet kanë një rritje, por në fund diferencën e bëjnë rezultatet dhe klasifikimi me Milanin që aktualisht nuk ka asnjërën...