Kastrioti thyen Besën dhe nis arratinë
Kavajasit harrojnë të fitojnë, shfaqen të përgjumur dhe humbin dy vende në renditje
Kastrioti merr arrat inë dhe fut Besën në krizë. Humbja e tretë radhazi dhe e dyta në shtëpi bën që kavajasit të mbeten në kuotën e 12 pikëve dhe të humbasin dy vende në renditje. Nga ana tjetër, krutanët mbeten jo vetëm në krye, por edhe të pathyeshëm pas 8 javësh kampionat. Pas 6 fitoreve dhe dy barazimeve shkojnë në kuotën e 20 pikëve dhe të shkëputur me 6 pikë nga rivali më i afërt, Besëlidhja. Një gol i Xhynejt Çutrës u ka mjaftuar për të vijuar serinë e rezultateve pozitive dhe vendosin "diktatin" në Kavajë, përballë një Bese, e cila ishte në një ditë realisht të keqe.
PJESA E PARË
Të besuarit e Samuel Nikajt shfaqen kërkues që në nisje, me Çutrën dhe Markun që futen në zona të rrezikshme, por pa "shënjestruar" siç duhet. Kavajasit janë "të përgjumur" dhe rrjedhimisht nuk arrijnë që të ndërtojnë asnjë
aksion për të qenë. Kastrioti shfaqet pragmatist dhe në të 30-ën e sheh veten në avantazh pas një eurogoli. Një goditje dënimi ekzekutohet mjeshtërisht prej Çutrës, i cili shtang portierin dhe çon shifrat në 0-1. Sinella mundohet që të ndryshojë diçka, duke "freskuar" formacionin, por më kot, pasi edhe në 15 minutat e mbetura mbetën hije e vetvetes në fushën e lojës. Ishin "të mpirë" dhe tejet të lexueshëm për kundërshtarin.
PJESA E DYTË
Rinisja e lojës sjell një reagim të kavajasve, përmirësohen ndjeshëm dhe krijojnë më shumë, por duket se as fatin nuk e kanë në favor, pasi godasin vetëm... shtyllën. Nisën disa zbritje dhe u mor disa herë iniciativa për kalimet përpara, sidomos nga e djathta, por mungoi "regjizura". Sulmi mbeti i shkëputur, veproi pa ide e intuitë, duke sjellë një "çoroditje" si në pasime. Shumë më të organizuar e të qartë shfaqen miqtë. Marrin masa të rrepta në prapavijë dhe kundërsulmojnë rrezikshëm me Lilajn e Çutrën, ndërsa edhe lojtarët e tjerë mbështesin e dublojnë mirë. Ndonëse nuk shënuan një tjetër gol, rastet e krutanëve disa herë qenë tepër të rrezikshme. Kastrioti, falë grintës së admirueshme, ia doli jo vetëm që të ruante epërsinë dhe mbyllte me fitore minimale këtë transfertë.