Sondazhi, Tare “Drejtori i Vitit” në Itali
Dështimi i Italisë: paimagjinueshëm Botërori pa të, ja si vjen ringritja
Përzgjedhja e lojtarëve, blerjet e goditura dhe ndërtimi i një skuadre më shumë se simpatike, janë tregues të qartë të punës së madhe, vizionit dhe cilësive në aspektin e drejtimit të një klubi me pretendime në Itali. Mirëpo, vetëm vlerësimet dhe bilancet pozitive të Lacios nuk mjaftojnë për Taren. Drejtori Sportiv i bardhekaltërve gëzon edhe vlerësimin e sportdashësve dhe ka popullaritet të gjerë në Itali, kur bëhet fjalë për votimin dhe garën e drejtuar nga sportdashësit në një konkurs. Portali informativ në Itali, "Tuttomercato/eb", ka mbyllur dje votimet, ku sportdashësit italianë e kanë vlerësuar "Drejtor- in Sportiv të Vitit" në Itali. VLERËSIMI
Me një përqindje shumë të lartë, Tare është përzgjedhur si "Drejtori i Vitit". Me më shumë se 1/3-at e votave totale, ish-bomberi i Kombëtares shqiptare të futbollit ka marrë vlerësimin final. Pas drejtorit sportiv të Lacios, i cili ka marrë 34.99> të votave, është renditur Marko Xhaniti i Frozinones dhe pas tij Vanjati i Spal. Drejtues si Mirabeli i Milanit, Marota i Juventusit si dhe Auzilio i Interit, së bashku, nuk bëjnë dot as gjysmën e votave të tij.
DEKLARATA
I kontaktuar nga portali, drejtori i Lacios e ka ndarë vlerësimin me bashkëpunëtorët e tij. "Pa të gjithë komponentët është e pamundur që të arrish rezultate. Duhet të komplimentoj të gjithë stafin tim, pastaj Simone Inzagin, me të
cilin kemi pasur fatin të bashkëpunojmë prej 12 vitesh me të njëjtin grup. Kemi luajtur së bashku, pastaj është rritur në sektorin e të rinjve dhe tashmë në skuadrën e parë. Ai përfaqëson vlerat e klubit dhe skuadra bën një lojë argëtuese. Meritat janë të gjitha të tijat", është shprehur Tare.
ITALIA
I pyetur në lidhje me dështimin e Italisë, Tare ka shpjeguar idenë e tij. "Nuk shoh asgjë kaq shumë tragjike. Në Gjermaninë e viteve '90 ishte i njëjti problem. Pas botërorit ishte i nevojshëm ndërrimi i brezave. Tashmë duhet të bazohemi te të rinjtë, me një projekt katërvjeçar. Duke u dhënë mundësinë të rinjve, do të arrihen rezultate, pasi ata do të rriten gradualisht. Zhgënjimi është shumë i madh, thuajse një "shok", pasi është e paimagjinueshme një botëror pa Italinë. Por, në çdo gjë negative, unë shoh gjithmonë diçka pozitive. Të rinjtë italianë kanë shumë kualitet. U duhet dhënë besim", ka deklaruar Tare, i ftuar tek emisioni "Domenica Sportiva".