Prapaskena, Milinkoviç dha dorëheqjen para ekipit
-Kukësi është tashmë në krizë, verilindorët nuk dinë të fitojnë, por jo vetëm kaq. Ata pësojnë humbjen e dytë në shtëpi, në gjashtë takime që verilindorët kanë zhvilluar në "Zeqir Ymeri". Një gjë e tillë nuk ka ndodhur në asnjë prej sezoneve të mëparshme. Verilindorët kanë humbur vendin e dytë dhe, tashmë, kjo situatë kërkon një zgjidhje.
-Grupimi "Ultras Guerrils" ka sfiduar të ftohtin dje dhe ka mbështetur skuadrën për 90 minuta në stadiumin "Zeqir Ymeri". Edhe pse ka qenë një ditë pune, ultrasit e kuq nuk kanë munguar. -Rreth një orë para fillimit të takimit, ishte presidenti Gjici që, në një cep të fushës së stadiumit, bisedoi rreth 10 minuta me trajnerin Milinkoviç, i cili ishte i shoqëruar nga ndihmësi dhe përkthyesi i tij Vasil Papa. Gjici dukej mirë në shoqërinë e trajnerit, të cilit i ka besuar më shumë se kujtdo tjetër më parë dhe, mbas disa rezultateve jo të mira, ai i ka dhënë besim. Simpatia e presidentit për trajnerin serb mund të bëjë që, edhe mbas këtij rezultati dëshpërues, ai të qëndrojë trajner i Kukësit. Mbas përfundimit të bisedës me teknikun, numri një i klubit vazhdoi drejt zyrës së tij në brendësi të stadiumit "Zeqir Ymeri", në të cilin para ndeshjes priti një përfaqësi të Partizanit me në krye drejtorin Olsi Rama, të cilin e shoqëroi gjatë gjithë ndeshjes, si dhe me Luçiano Moxhin.
-Ekipi i Kukësit doli në nxehmje, ku gjithçka dukej në rregull dhe trajneri kishte bërë llogaritë e tij, për formacionin, strategjinë dhe çdo gjë tjetër. Por jo gjithçka doli ashtu siç e kishte parashikuar trajneri. Mbas rreth 30 minutash nxehmje, ishte portieri Enea Koliçi që nuk u ndje mirë, pasi pati probleme të theksuara me gjurin. Pogradecarit iu bllokua gjuri dhe me zor lëvizte. Një gjendje që nuk i kishte ndodhur kurrë më parë, të cilën e pohon dhe vetë lojtari. Pasi u konsultua me mjekët, ata së bashku me stafin vendosën që mos të aktivizohej, që lëndimi të mos përkeqësohej dhe të shtoheshin problemet. Kështu trajneri Milinkovic hodhi në fushë Stivi Frashërin.
-Trajneri Milinkoviç nuk e aktivizoi kapitenin për çështje teknike, të cilat i tha dhe vetë mbas ndeshjes se, duke parë gjendjen jo aq të mirë të Hallaçit, vendosi që ta linte në stol. Në vend të kapitenit u aktivizua Idrizi. -Para se të fillonte takimi, ishin të gjithë futbollistët e Kukësit, madje dhe Elis Bakaj, i cili mungonte për shkak kartonësh, ku fantazisti iu dha mbështetje morale, e gjatë gjithë kohës ishte në tension për gjendjen e skuadrës. Bakaj i ka vuajtur golat e Partizanit, aq sa në pushim të pjesës së parë zbriti nga tribuna e takoi trajnerin dhe shokët e ekipit. Para se të niste ndeshja, ishte trajneri që i tha ekipit që të hyjnë me besim në fushë dhe të japin më të mirën, sepse ekipi ka potencialin për të fituar me këdo. Në të njëjtën linjë ishte dhe kapiteni Ylli Shameti, i cili i kërkoi skuadrës përqendrim dhe të mos bënin gabime dhe çdo gjë do shkonte mirë. Qendërmbrojtësi u kujtoi shokëve të tij se ata përfaqësonin ekipin kampion të Shqipërisë. Pasi foli trajneri dhe kapiteni, ekipi doli për në fushën e blertë.
-Në pushim të pjesës së parë, trajneri shpjegoi gabimet dhe u mundua të qetësonte lojtarët, pasi shumë të nervozuar disa prej futbollistëve filluan të flisnin me zë të lartë, sidomos kapiteni Shameti që kritikoi ekipin dhe u kërkoi atyre kthesë të menjëhershme. Si për çudi, këtë ndeshje presidenti Gjici nuk zbriti në dhomat e zhveshjeve, përveçse disa prej drejtuesve të tjerë të lartë të klubit, të cilët dhe ata kërkuan përmbysjen e rezultatit, gjë që nuk ndodhi. -Sapo ndeshja përfundoi, të gjithë lojtarët me vrap të turpëruar e mbajtën frymën te dhomat e zhveshjeve, në të cilën shumë të nervozuar kërcitën stolat nga shkelmat e disa prej lojtarëve. Mbas tyre hyri dhe trajneri Milinkoviç me ndihmësin e tij Vasil Papa. Trajneri, mjaft i zhgënjyer, u tha në gjuhën greke lojtarëve se tashmë ai nuk është më trajner i Kukësit dhe se po ua thotë këtë ai vetë që të mos e dëgjonin nga mediat. Dhe se është i zhgënjyer me këtë paraqitje të ekipit. "Jam i zhgënjyer nga kjo ndeshje, unë nuk jam më trajneri juaj tani, po ua them vetë këtë gjë, që ta dëgjoni nga goja ime, të mos e merrni vesh nga mediat. E kishim përgatitur ndryshe këtë ndeshje, nuk mund të ndodhte kështu. Nuk kam ç'të them më, do jap dorëheqjen", ka qenë fjalimi i Milinkoviçit përreth 2 minuta e më pas ka dalë për deklaratat në media.
-Ndërsa presidenti Gjici është takuar me drejtuesit e Partizanit dhe është larguar direkt nga stadiumi. Zhgënjimi i tij ka qenë i madh dhe nuk ka folur as për mediat.
-Gazeta mëson se trajneri ka marrë përgjegjësitë dhe i ka kërkuar ndjesë presidentit Gjici, me të cilin ka takim sot në mëngjes për të vendosur se çfarë do të bëjnë. Trajneri i ka paraqitur dorëheqjen, dhe mbrëmjen e djeshme ka pasur një takim mes palëve, ku presidenti mësohet se nuk e ka pranuar atë. Sot në orën 09:00 do të ketë mbledhje urgjente te skuadra e Kukësit.
-Një gjë është e sigurt, Kukësi nuk po lundron në ujëra të qeta e tashmë pritet furtunë në ekip. Mund të ketë largime apo përjashtime që tani nga ekipi dhe dënimi më i lehtë është gjoba me një rrogë për secilin prej futbollistëve. Skerdilaid Sulozeqi
Bakaj duke takuar drejtuesit e kuq